Ndërroi jetë Bashkim Fino, shpallet Ditë zie Kombëtare

Ndërroi jetë Ish-Kryeministri i Shqipërisë dhe deputeti aktual i PS, Bashkim Fino. 58-vjeçari Fino ishte prekur nga COVID-19 prej disa ditësh ndërkohë gjendja e tij u përkeqësua.

Kryetari i PS dhe Kryeministri i Shqipërisë, Edi Rama njoftoi se sot do të anuloj të gjitha aktivitetet në kuadër të fushatës elektorale për zgjedhjet e 25 prillit, vendim të cilin e mori edhe Kryetari i PD, Lulzim Basha.

Ndërkohë Kryeministri Rama, në nderim të të ndjerit, Bashkim Fino, vendosi që 29 Marsi 2021 të shpallet Ditë zie Kombëtare.

Ndryshe, Bashkim Fino lindi më 12 tetor 1962 në Gjirokastër. Studimet e larta i kreu në Universitetin e Tiranës, Fakulteti Ekonomik, dega Financë. Në vitin 1992. Fino u zgjodh Kryetar i Bashkisë Gjirokastër, post të cilin e mbajti deri në vitin 1996. Kryeministër i Shqipërisë ishte prej 9 mars 1997 deri më 29 qershor 1997. Nga viti 1997 deri në 1998 ushtroi detyrën e Ministrit të Pushtetit Lokal, njëkohësisht dhe Zv/kryeministër. Në 1999 deri në vitin 2001 ishte ministër i pushtetit lokal ndërsa gjatë viteve 2001-2002 ka qenë Ministër i Punëve Publike dhe Turizmit.