Ndërron jetë gazetari që u qëllua në qendër të Amsterdamit

Gazetari i njohur investigativ në Holandë, Peter R de Vries, i cili është qëlluar dhe plagosur rëndë në qendër të Amsterdamit, nëntë ditë më parë, sot ka ndërruar jetë bëjnë të ditur familjarët e tij.

Në një deklaratë për mediat thuhet se “Peter ka luftuar deri në fund, por nuk ka arritur të fitojë betejën”.

De Vries, 64 vjeç, raporton RFE, është qëlluar në kokë disa minuta pasi ka lënë një studio televizive.

Në të kaluarën, gazetarit i është dhënë mbrojtje nga policia, pasi ka marrë kërcënime, për shkak të përfshirjes në çështje penale si gazetar investigativ.

Komisionerja e Këshillit të Evropës për të Drejtat e Njeriut, Dunja Mijatoviç, tha se vdekja e gazetarit është një lajm i tmerrshëm dhe shkatërrues.

“Peter ka jetuar me bindjen: ‘Me një gju të përkulur nuk ka asnjë mënyrë të jesh i lirë’. Ngushëllime familjes dhe gjithë gazetarëve!”, u shpreh Mijatoviç përmes rrjetit social Twitter.

Policia në Holandë ka raportuar se sulmuesi i dyshuar është një shtetas holandez, 21 vjeç.