Ndërron jetë Haxhi Thaçi/ Ngushëllime Ish-Presidentit të Kosovës, Osmani: I lehtë i qoftë dheu i Kosovës!
Pas humbjes së babait, Presidentja e Kosovës, Vjosa Osmani ka ngushëlluar Ish-Presidentin Hashim Thaçi me shpresën se kontributi dhe dashuria e Haxhi Thaçit për atdheun, të shndërrohen në udhërrëfyes dhe kujtime krenarie për të gjithë ata që e njohën.
“Me pikëllim mësuam lajmin për ndarjen nga jeta të z. Haxhi Thaçi, babait të ish-Presidentit dhe ish-Kryeministrit të Republikës së Kosovës, z. Hashim Thaçi.
Humbja e babait është dhimbje e pamatshme, e cila lë boshllëk të pazëvendësueshëm tek më të dashurit. Kontributi dhe dashuria e tij për atdheun, shpresoj të shndërrohen në udhërrëfyes dhe kujtime krenarie për të gjithë ata që e njohën,” shprehet Vjosa Osmani në ngushëllimin e saj duke përfunduar:
“Në emrin tim dhe në emër të popullit të Kosovës, ju shpreh ngushëllimet më të sinqerta ish-Presidentit Thaçi, gjithë familjes Thaçi, si dhe miqve e të gjithë të afërmve të z. Haxhi Thaçi.
Qoftë i përjetshëm kujtimi për të! I lehtë i qoftë dheu i Kosovës!”
Ndryshe, Haxhi Thaçi ndërroj jetë mbrëmjen e së dielës në Klinikën e QKUK në Prishtinë, tre ditë pasi Ish-Presidenti i Kosovës, Hashim Thaçi, i cili aktualisht po përballet me gjykimin në Gjykatën Speciale Hagë mori leje për të vizituar babanë e tij në spital, pas disa refuzimeve nga gjykata.
Pas vizitës treorëshe, ai u rikthye sërish në paraburgim në Hagë, ku po mbahet nga Nentori i vitit 2020.
