Ndërron jetë Presidenti i Parlamentit Evropian, David Sassoli

Presidenti i Parlamentit Evropian, David Sassoli ka ndërruar jetë në moshën 65-vjeçare. Lajmin e ka bërë të ditur zëdhënësi i tij, Roberto Cuillo duke saktësuar se ai ka vdekur më 11 janar në një spital në Aviano të Italisë.

Më 10 janar, Parlamenti i BE-së ka konfirmuar se politikani italian i qendrës së majtë, është shtrirë në një spital në Itali prej 26 dhjetorit. Përmes një deklarate, është thënë se “shtrirja në spital ka qenë e domosdoshme për shkak të komplikimeve serioze të nxitura nga mosfunksionimi i sistemit imunitar”.

Ndryshe, David Sassoli ka qenë anëtar i Parlamentit Evropian prej vitit 2009. Më 2019, ai është zgjedhur President i Parlamentit Evropian pas propozimit të bërë nga Aleanca Progresive e Socialistëve dhe grupi i demokratëve.

Mandati i tij do përfundonte në fund të këtij muaji, dhe ai nuk pritej që të kandidonte për një mandat të dytë.