Ndërron jetë themeluesi i kirurgjisë vaskulare në Kosovë, Gazmend Shaqiri
Pas një sëmundje të rëndë, ka ndërruar jetë në moshën 83 vjeçare, kirurgu i njohur kosovar, Gazmend Shaqiri.
Lajmin për vdekjen e tij e ka bërë me dije drejtor i Klinikës së Kirurgjisë Vaskulare, Hajriz Rudari.
“Të nderuar kolegë, me dhimbje të thellë ju njoftoj se sot me datë 15 Korrik 2019, pas një sëmundjeje të rëndë, ndërroi jetë Profesori ynë i nderuar dhe themeluesi i Klinikës së Kirurgjisë Vaskulare, në Republikën e Kosovës Prof. Dr. Gazmend Shaqri,” thekson Hajriz Rudari duke shprehur ngushëllime në emër të stafit të Klinikës së Kirurgjisë Vaskulare,familjes, kolegëve dhe mbarë popullit të Kosovës ndërsa përfundon:
I përjetshëm qoftë kujtimi për Profesorin e nderuar!
Ndryshe, kirurgu i njohur Prof. Dr. Gazmend Shaqiri u lind më 1936 në Shkodër, biri i luftëtarit të njohur në luftën anti-fashiste, Ismet Shaqiri. Shkollën fillore dhe gjimnazin e kreu në Prishtinë, ndërsa Fakultetin e Mjekësisë në Beograd. Specializoi për kirurgjinë e përgjithshme në Akademinë Ushtarake në Beograd, më 1969, ndërsa për kirurgji kardiovaskulare në UKECH në Pragë dhe më vonë në Texas (Heart Institute në Hoeston).
Shaqiri është themelues i kururgjisë vaskulare në Kosovë. Me hapjen e Fakultetit të Mjekësisë në Prishtinë, u zgjodh ligjërues (1969), pastaj ishte prodekan dhe dekan i këtij fakulteti. Mbrojti doktoraturën nga lëmi i kirurgjisë së enëve të gjakut më 1974 dhe më pas mori edhe tituj shkencorë. Më 1983 u bë profesor ordinar i lëndës së Kirurgjisë në Universitetin e Prishtinës.
Një kohë ishte në krye të Klinikës së Kirurgjisë dhe Ortopedisë në Prishtinë. Punoi dhe në Pragë.
Pas luftës së fundit në Kosovë, udhëhoqi Shërbimin e Kirurgjisë Vaskulare. Qe mësimdhënës i shumë kuadrove dhe kreu me sukses një numër të madh të operacioneve të ndërlikuara kirurgjike.
Ka botuar rreth 200 punime shkencore dhe mori pjesë në shumë tubime e tribuna shkencore në vend dhe jashtë. Botoi disa libra dhe monografi nga lëmi i kirurgjisë vaskulare dhe asaj të përgjithshme, si: “Sëmundjet e arterieve”, “Kirurgjia e zemrës dhe aortës”, “Doracak medicinal në praktikën ditore”, “Kirurgjia urgjente – lëndimet”, “Kirurgjia urgjente – sëmundjet akute”, “Monografia e ndërhyrjeve emergjente” etj.
