Ndërron jetë Kryetari i Komunitetit Bektashian të Kosovës

Kryetari i Komunitetit Bektashian të Kosovës, Baba Mumin Lama ka ndërruar jetë.

Lajmin e ka bërë të ditur përmes një njoftimi ky Komunitet duke shtuar që Baba Mumini qoftë drita jonë që na udhëzon në shtegun e pastër të Ehli Bejtit

“Myrshydi ynë njihej gjithandej për qetësinë që reflektonte, për urtësinë e bujarinë e madhe. Tregonte respektin për çdo qenie njerëzore, ngritej me konsideratë si për fëmijët ashtu për të moshuarit. Nuk dallonte njerëzit në elemente që diferencojnë, por këto i konsideronte pasuri të esencës së qenies njeri – duke shprehur dashuri për secilin, si veçoria kryesore e klerikut të shtegut të Hynqar Haxhi Bektash Veliut.

Ne, bektashinjtë e Kosovës dhe të gjithë dashamirët e anëtarët bektashianë gjithandej, do të ngushëllohemi me faktin se kjo është ndarje e përkohshme. E ngushëllojmë veten me kujtimet e bukura që Baba Mumini na i la.

Qofshim të denjë për t’i ndjekur mësimet e Baba Muminit.

Baba Mumini qoftë drita jonë që na udhëzon në shtegun e pastër të Ehli Bejtit,” thekson Komuniteti Bektashian ndërsa për ceremoninë e varrimit shton se do të lëshoj një njoftim të veçant.