Ndërtimet pa leje, Edi Rama: Të nisë aksioni nga Velipoja në Ksamil!
Kjo Policia e Shtetit e shfarosi fenomenin e kultivimit masiv të kanabisit por jo edhe ndërtimet pa leje, tha sot Kryeministri Edi Rama në takimin për Mbrojtjen e Territorit dhe zbatimi rigoroz i Kodit Penal për aktivitetet e paligjshme, nga ndërtimet pa leje tek prekja e pyjeve, lumenjve, liqeneve dhe zonat e mbrojtura natyrore e kulturore. Dhe jo vetëm kaq! Për një çati, tha Edi Rama, Policia e Shtetit shkon në fund të botës, ndërsa mungon një polic i zellshëm në zonat turistike.
“Sot jemi këtu për të vënë një theks shumë të fortë te domosdoshmëria e kalimit në një fazë tjetër, për kontroll absolut mbi territorin nga ndërhyrjet dhe aktivitetet e paligjshme, qëllimi kryesor është për të rritur sa më shumë e sa më shpejt vetëdijen e gjithë strukturave të policisë së shtetit, në raport me këtë aspekt kaq të rëndësishëm të qeverisjes dhe detyrimeve.
Vijojmë të jemi në një fazë konfuzioni mes institucioneve dhe mungese ndërveprimi konstant të orientuar e të suksesshëm, gjë që kërkon nga njëra anë një mbështetje të plotë në aspektin ligjor, dhe këtë e këmi tashmë të garantuar, dhe nga ana tjetër kërkon një paketë të re aktesh nënligjore, ku të gjitha përgjegjësitë dhe ndërveprimet të jenë të qarta për të gjithë,” tha Rama duke shtuar se është shumë e rëndësishme të kuptohet, nga të gjithë aktorët se çdo ndërtim pa leje sot rrit në mënyrë të ndjeshme kosot e përbashëkta nesër dhe nga ana tjetër, kemi ndërtimet me leje që bëhen vatra abuzimi ku mbi lejen e dhënë ndërtohen volume të tjera e krijohen deformime të mëdha, përsëri me kosto për komunitetin.
“Që policia e ka kapacitetin ta kontrollojë në çdo cm territorin këtë e tregon një fakt i thjesht, por edhe sekëlldisës që kur vjen puna për një mur, cati në fund të botës, zona rurale të thella, gjendet polici që shkon atje e i kërkon llogari një fshatari, po kur vjen puna për abuzime flagrante në zona turistike, buzë rrugës, cuditërisht nuk gjendet i njëjti polic i zellshëm. e kuptoni shumë mirë pse-në e këtij kontrasti. Ajo që na intereson sot është të fokusohemi të fakti se policia i ka të gjitha kapacitetet të bëhet mburojë në të gjithë territorin në raport me këtë krim e gjithë larminë e krimeve ndaj mjedisit. Eksperienca e krijuar në këtë periudhë është e madhe, janë në gjendje të japin idetë e tyre e të shtrojnë hapur e qartë problematikat e tyre, për të hartuar sa më shpejt atë paketë aktesh mbi të cilat duhet të funksonojë kjo fazë e re.
Çdo krim ndaj territorit duhet të jetë i barazvlefshëm me cdo aspekt tjetër ndaj luftës së saj. Kjo duhet përcjellë në gjithë strukturën e policisë së shtetit. Është e pamundut të tolerohet një situatë e tillë. Zonat turistike janë si drita e syve për Shqipërinë, janë baza e zhvillimit në funksion të të ardhmes dhe ne nuk mund të vazhdojmë të pranojmë inercinë e një kontrolli. Nëse e shohim në funksion të të ardhmes, është i papranueshëm. Po ashtu zonat e mbrojtura, rrugët kombëtare. Nuk e di kush ndërhyri që ndërkohë që kemi një detyrim sa i përket qarkullimit rrugor, parandalimit të aksidenteve rrugët të jenë qartazi në segmente te caktuara, me rrezik të lartë për shkak se në anë të tyre kryhen aktivitete pa asnjë lloj respekti për një mbrojtje minimale të atyre që kalojnë,” tha Kryeministri duke e pranuar se janë më pak se në të kaluarën por vijon të ketë.
Duke kujtuar se kjo është policia që shfarosi kultivimin e kanabisit, atëherë tha Edi Rama pse nuk e bënë të njejtën gjë në paligjshmërinë me ndërtimet, kryesisht në bregdet.
“Kjo është policia e shtetit që e shfarosi fenomenin e kultivimit masiv të kanabisit, nuk është një polici që erdhi nga hëna. Është kjo polici. Atëherë pse nuk u bënka e njëjta gjë me një aktivitet që është shumë më i lexueshëm. Bëhet fjalë për ndërtime në rërë, në sytë e të gjithëve, dhe pse u bëka për një fshatar në majë të malit dhe jo për ata që ndërtojnë në buzë të detit. Patjetër që në këtë proces, policia e shtetit ka përgjegjësinë kryesore, por nuk është e vetmja që duhet të marrë të gjithë përgjegjësinë sepse duhet harmonizuar gjithë inst. e tjera. Ama nëse e merr përgjegjësinë e plotë, edhe institucione të tjera do jenë të pamundësuara për të mbyllur sytë. Lejet e ndërtimit duhet dhe do t’i vihen në dispozicion policisë së shtetit, për të parë se cfarë aktiviteti është i lejuar në zonë.
Nuk e di ca përgjigje ka drejtori i Shkodrës për Velipojën psh. po mjafton të shohësh Velipojën, rërën bregun. E c’vlerë ka t’i shkohet njërin në Kallmet për një havlli. Nuk mund të lejohet të shfrytëzohet asnjë milimetë,r” tha Kryeministri duke shprehur besimin se kjo polici mund të ndryshojë në një kohë të shkurtër qasjen ndaj ndërtimeve të paligjshme.
“Kam besim se kjo polici shteti mund ta transformojë në një periudhë të shkurtër qasjen e krejt shtetit ndaj territorit, dhe mund të bëhet forca e domosdoshme e influencës pozitive me të gjitha strukturat e tjera. Duke nisur nga IKMT, e cila ka përballuar një volum të madh pune, po s’duhet të qëndrojë në territor. IKMT duhet të reagojë në kohë reale mbi bazë të ankesave të policisë së shteti. Flagrancën e ka Policia e shtetit, ndryshe procesi degjeneron nga të shkojnë sytë. Çdo komisariat ka zonën e vet, mbi këtë bazë të gjithë përgjigjen. Pushteti vendor është një tjetër pjesë e problemit.”
Edhe konfliktet mes IKMT, IMT, policia, duhen adresuar me shpejtësi nga ministri i brendshëm mbi bazën e një diskutimi të shpejtë, tha Rama, duke marrë sygjerimet tuaja që lidhen me eksperiencën që keni nga kjo fushë e konstatoni në praktikë.
“Një ndërtim pa leje, ndërhyrje në det në mes të Sarandës, të ndërhyhet në det, të hidhen gurë e të mbushet deti me gurë, kjo të ndodhë pa vajtur këmbë polici… dhe pastaj të vijë puna deri te unë e pasi ndërhyj unë ajo të pastrohet për 24 orë kjo është e papranueshme. Dmth u bëka, atëherë kush e mban përgjegjësinë që nuk është bërë. Policia duhet të jetë shumë rigoroze me vetveten e mos lejojë që disa individë të njollosin reputacionin e saj e më pas të të gjithë shtetit. Është një vijë e kuqe ndarëse kjo. Kjo nuk është mungesë aftësie, përvecse korrupsion. S’ka asnjë emër tjetër, korrupsion në kurriz të një dynjaje të tërë,” tha Kryeministri Rama duke kërkuar sa më parë nisjen e një operacioni në të gjithë vendin.
“Të niset operacion nga Velipoja në Ksamil dhe tani jo në mesin e verës kur të vijnë turistët. Pa asnjë tolerancë, dhe jo duke shkuar te ndërtime që janë bërë para 20 vitesh, sic ndodhi në Zvërnecit, po duke shkuar aty ku është e qartë fare. Jo duke u marrë me njerëzit që janë aty prej 25 vitesh e përsa kohë nuk ka një plan tjetër të vijojnë të bëjnë ato shërbime për turistët. Po duke shkuar e duke vendosur një vijë të kuqe, që nuk duhet shkelur nga askush. Aty ku hidhet beton pa leje, të ketë jo vetëm prishje po ndalime e procese penale në bazë të ndryshimeve të reja ligjore. Tani penalizohet i gjithë zinxhiri, mbikëqyrësi i punimeve, arkitekti, janë të gjithë pjesë. Kulmi që s’duhet të lejojë policia e shtetit gjallë, prishet nga shteti me shpenzimet e shtetit, e pastrohet nga shteti. Kjo s’duhet të ndodhë më. Nëse nuk i përballojnë ka kosto të tjera që duhet ti kenë në kurriz. Besoj se shumë shpejt kjo situatë do të kalojë në një fazë të re, sepse është bërë një punë e madhe, por e pamjaftueshme. Kostot janë të tmerrshme për ndërtimet,” tha Kryeministri Edi Rama duke përfunduar:
“Kulmi i kulmit që s’duhet ta lejojë më kurrë Policia e Shtetit, që prishet nga shteti, me shpenzimet e shtetit dhe pastrohet nga shteti. Ligji është i qartë fare, ata që e kanë bërë, duhet të përballojnë edhe të gjitha kostot e tjera. Nëse nuk i përballojnë, atëherë ka pasoja të tjera, që do t’i kenë në kurriz.”
