Ndërtuesit kërkojnë shfuqizimin e taksës së strehimit; Rama: Janë vënë në bazë të tregut!

Shoqata e Ndërtuesve përsëriti shqetësimin se rritja e çmimeve të referencës mbi të cilat llogaritet taksa e ndikimit në infrastrukturë dhe taksa 3% e strehimit social ka rritur mesatarisht 40% kostot për ndërtimin në Tiranë.

Erjon Harizi kryetari i bordit drejtues të Shoqatës së Ndërtuesve në një takim të zhvilluar nga Ministria e Sipërmarrjes me shoqatat e biznesit i kërkoi kryeministrit Edi Rama rishikimin e tyre, pasi ndryshimet e kryera në mes të vitit për kosto shtesë nuk janë llogaritur nga ndërtuesit.

“Si shoqata në muajin shtator ju kemi dërguar një letër në lidhje me disa problematika që na i kanë bërë të pamundur aktivitetin këtë vit. Kryesorja është miratimi i VKM-së nr457 të datës 26 Korrik 2023 që ka të bëjë me rritjen  e çmimit të referencës mesatarisht 40% për Tiranën. Nuk kundërshtojmë çmimet e referencës, por rritja e tyre po shkakton pasoja në taksën e ndikimit në infrastrukturës dhe në taksën 3% e strehimit, në të gjithë zinxhirin e taksave të bashkisë. Çmimet e referencës e kanë rritur mesatarisht koston e ndërtimit 40%.

Ndryshimet e çmimeve të referencës janë kundërshtuar prej nesh. Në takimin që kemi zhvilluar në muajin Qershor me ministren kemi theksuar që këto ndërhyrje nuk mund të bëhen në mes të vitit, pasi nuk janë llogaritur nga ndërtuesit këto pagesa”, pohoi Harizi.

Kryeministri Edi Rama tha se çmimet e referencës, nuk janë vënë në mënyrë arbitrare, por në bazë të tregut. Rama pohoi se apartamentet në Tiranë po shiten me çmime deri në 5,000 euro për metër katror dhe nga ndërtuesit deklarohen çmime larg së vërtetës.

“Çfarë nuk kishit parashikuar ju, që shteti do t’u thoshte që nuk mund të vazhdoni të deklaroni shitje shumë nën faktin. Këtë nuk kishit parashikuar? Kishit përgatitur një plan biznesi që do të gënjenit shtetin pa mbarim, dhe do të shisnit apartamente me 2,000 euro dhe do i deklaronit të shitura me 850 euro? Këtë nuk e kishit parashikuar? Në plan biznesi e kishit edhe evazionin?

Nuk kishit parashikuar që shteti do të vinte momenti e të thoshte “Stop”. Ju ndërtoni bëni shumë mirë që e bëni por paralelisht bashkitë duhet të ndërtojnë infrastrukturën, rindërtojnë të gjithë hapësirat rreth e rrotull që nuk merrni përsipër të bëni gjë duke nisur nga Tirana. Që ju të shisni apartamente me 2,000, 3,000, 4,000, 5,000 euro, të shisni hapësira biznesi me 6,000 euro,7,000, 8,000 euro e të deklaroni atje çmime që janë larg së vërtetës nuk mund të vazhdojë. Çmimet e referencës, nuk janë vënë në mënyrë arbitrare, por në bazë të tregut.

Nuk është e vështirë të marrësh vesh sa shitet një metër katror tek ish Blloku dhe tek liqeni. Është bërë një studim i thjeshtë i tregut, janë marrë çmimet reale dhe ju është vënë detyrimi që ju duhet të përgjigjeni. Çfarë nuk keni parashikuar? Sa doni të fitoni në këtë histori? Është e drejta juaj të fitoni sa më shumë. Kini parasysh se nuk e dëgjojmë më fare. Nuk është akoma maksimumi që duhej të vendosur. Është bërë një kohë e gjatë që është qëndruar në çmime të vjetra ndërkohë që çmimet rriten çdo javë. Është rritje që do të përfitojnë të gjithë jo vetëm ju”.

Shoqata e Ndërtuesve kërkoi edhe shfuqizimin e taksës së strehimit social.  Sipas kryetarit të bordit drejtues të shoqatës Erjon Harizi ndërtuesit në Tiranë deri për 2022 kanë paguar 100 milionë euro për të pastrehët. “Kjo taksë që ka qenë e përkohshme duhet të shfuqizohet”, theksoi ai.

Kryeministri Edi Rama në përgjigje të shqetësimit të shoqatës solli si shembull se taksa e kontributit social paguhet edhe në Nju Jork, madje duke i detyruar ndërtuesit të lenë përqindje të caktuara për dhënie apartamentesh me qira. Rama tha se taksa 3% do të vazhdojë të jepet aty ku ndërtohet, duke përfituar nga programet sociale të pastrehët.

Gjatë takimit Rama tha se zhvillohet një analizë e procedurave të dhënies së lejeve të ndërtimit për turizmin, që shfaqin problematika me pronësinë./Monitor/