N’dispozicion të Komisionit Hetimor për 25 prillin, Rama: Vettingu në Politikë, gati…

Pas mbledhjes me drejtuesit e qarqeve, Kryeministri Edi Rama tha se nuk kishte ftesë por është në dispozicion të Komisionit Hetimor për zgjedhjet e 25 prillit ndonëse deputetët e Partisë Socialiste vazhdojnë të bllokojnë punën e këtij Komisioni ndërsa shprehu gatishmërinë për të diskutuar për Vettingun në Politikë.

“Nuk kam pasur asnjë ftesë, jam në dispozicion, për të gjitha gjërat që do të më kërkohet për gjërat që kam për të thënë, ai është një komision që është ngritur me kërkesë të opozitës, e dimë si kanë rrjedhur ngjarjet. Nuk ka, jo vetëm qytetarë të angazhuar në zgjedhje në krahun tonë, apo të angazhuar si një votues i lirë pa qenë i lidhur me një parti, por nuk ka as mes demokratëve që PD humbi zgjedhjet. Ndërsa këto histori për masakra, janë punë e tyre,” tha Edi Rama ndërsa për Vettingun në Politikë sot tha se pranon të ulet në tryezë për të dëgjuar opozitën, për të thënë ato që mendojnë, do flasin ekspertët dhe në fund do dalin konkluzionet.

“Do të ulemi me vullnet të mirë për çdo gjë që opozita do të diskutojë. Më 2018 ka pasur një propozim, që është konsideruar jo bindës. Nuk dimë gjë për propozimin e ri. Janë tre vite, në tre vite gjërat evoluojnë, argumentet po. Nëse ka argumente bindës, ne do bëjmë më të mirën.

Seriozitet mbi parimin se jemi gati të diskutojmë çdo gjë, fillon nga këtu. Nëse që në fillim ne themi fjalën e fundit në dialog, atëherë s’ka tryezë. Do të ulemi në tryezë, do të japim gjithë disponimin për të dëgjuar, do dëgjojmë, do themi ato që mendojmë, do marrim mendimet e ekspertëve tanë të fushës dhe do arrijmë në konkluzione në mënyrë sa më civile. E kam thënë që cilësia e demokracisë, e bashkëjetesës, nuk varet nga sa shpesh biem dakord, por nga mënyra se si nuk biem dakord. Mund të mos biesh dakord duke gjuajtur me gurë, por edhe duke argumentuar normalisht. Ne duam këtë të dytën.”

Mbrëmjen e sotme Kryeministri Edi Rama foli edhe për situatën e krijuar në Partinë Demokratike duke e vlerësuar si humor të zi, atë që po ndodh në PD.

“Nuk kam asnjë koment lidhur me atë që ndodh në fushën e PD, por di të them nëse do të ishin mbledhur humoristët dhe satiristët e të gjithë vendit për të shkruar një pjesë me shumë seri se si PD mund të katandisej në humor të zi, është ajo që po ndodh në PD”.