NDODHË EDHE KJO! I plotfuqishmi i Serbisë: Jam përgjuar nga shërbimi…

Sot kur në Serbi nuk kanë nevojë as për Babagjyshin e Vitit të Ri sepse kanë plotfuqishmin Aleksandar Vuçiç, ai ankohet se shërbimi sekret po e përgjon. Madje për të përditshmen serbe “Kurir” është shprehur se e kanë përgjuar plotë 18 muaj, dhe e din se kush qëndron pas këtij, siç e quajti, aksioni, dhe beson që organet kompetente do ta hetojnë.

Pak kush beson në “brishtësinë” e Presidentit të Serbisë, Aleksandar Vuçiç, i cili mendohet se kontrollon ujin, ajrin dhe tokën serbe ndonëse trazoi partinë e tij SNS e cila vazhdon dhe i beson fjalëve të liderit, dhe e pagëzoi, grusht shteti!

Vuçiç tha se ka dëshmi, bisedat e tij të përgjuara, ekspertët e sigurisë thonë se kjo është një shkelje e rëndë penale dhe paraqet përpjekje për përmbysje të rendit kushtetues, ndërsa kriminelët përmes të cilëve Aleksandar Vuçiç erdhi në pushtet, ishin dhe vazhdojnë të jenë nën kontrollin e Shërbimit Sekret të Serbisë, i cili gjatë luftërave në Ish-Jugosllavi, me urdhër të kriminelit Sllobodan Millosheviç, përcaktoi se kush do të jetë i pasur në të ardhmen në këtë vend që tashmë është dhe foleja e krimit ballkanik.   

Dëshmitë e Vuçiçit

“Që jam përgjuar kam dëshmi. Kam bisedat personale që më janë përgjuar, sepse dikush ka menduar se mund ti fshijë, që ti fshehin. Por mos t’ju shkon nëpër mend kur keni këtë mbështetje të popullit, ka shumë njerëz që dëshirojnë të punojnë me ndershmëri dhe në mënyrë profesionale dhe nuk pranojnë gjëra të tilla. Kështu që besoj se organet kompetente do ta hetojnë rastin, nëse ka pasur shkelje të ligjit, shkelësit do të përgjigjen,” tha Vuçiç në intervistën ekskluzive për numrin festiv të gazetës “Kurir” ndërsa i pyetur se a e dinë se kush e ka përgjuar, përkatësisht me urdhër të kujt, shtoi:

“Nuk i di emrat e atyre që më kanë përgjuar. Por, mendoj se e di kush qëndron prapa kësaj. Unë nuk jam nga ata njerëz që me pasion do të merret me hakmarrje, unë e di si duket dhe e kam të qartë,” tha Presidenti i Serbisë i cili sot nuk ka opozitë por ka polici e ushtri, dhe na paska edhe shërbim sekret që e përgjon ndërsa e gjithë kjo, sipas tij, ka zgjatur “një vit e gjysmë”.

Partia e tij u shqetësua për fatin e liderit ashtu si dhe qeveria ndërsa bashkëpunëtorja e tij e ngushtë dhe Zv/Kryeministrja e Serbisë, Zorana Mihajlloviç i vuri dhe emrin:

“Së pari, kjo sipas meje është grusht shteti. Jo vetëm që duhet të hetohet, por e gjithë kjo duhet ta ketë dhe fundin. Që ta dimë kush, kur dhe pse e ka bërë…”

“Çarshia e dinte”

Drejtori i Institutit Ndërkombëtar për Siguri, Orhan Dragash, vlerëson se përgjimi i i presidentit është përpjekje për përmbysjen e rendit kushtetues ndërsa shton se çarshia e mirë informuar e dinte se ai ishte përgjuar dhe është e rëndësishme që ai foli publikisht sepse e bënë të pakuptimtë çdo lloj aksioni të ngjashëm kundër tij dhe shtetit

“Gjithashtu është e rëndësishme që organet kompetente shtetërore të kryejnë hetimin e thelluar të gjithë rastit, dhe unë jam i bindur se ato tashmë janë duke e bërë e përgjegjësit do të dënohen ashpër. Përgjimi i bisedave të shefit të shtetit jo vetëm që është vepër e rëndë penale por tregon se kryesit e veprës janë jashtëzakonisht të pamatur, dhe të bindur se janë më të fuqishëm se shteti dhe njeriu i parë këtij shteti. Padyshim është përpjekje për përmbysje të rendit kushtetues,” tha Dragash duke kaluar ylberin e ekspertit për të folur si Sllobodan Millosheviç:

“Ka shumë prej atyre që i duan të keqen Serbisë, ka këtu por edhe jashtë, dhe mendojnë se si ti realizojnë qëllimet e tyre duke i bërë dëm Vuçiçit, si njeriut më me ndikim. Ky që në fillim është një vendim jo inteligjent sepse parashikojnë që çfarëdo lloj kërcënimi ose shantazhi krijon kundërefekt, dhe duhet të presin reagim të ashpër dhe të shpejtë,” thotë Drejtori i Institutit Ndërkombëtar për Siguri, Orhan Dragash, edhe sot kur Vuçiç ka zhdukur opozitën ndërsa liderët evropian në krye me kancelaren Merkel e njohin si liderin e vetëm në Ballkan.  

Por Vuçiç nuk u ngop me Orhan Dragashin, degjeneroi dhe përdori edhe njeriun që respektohej në sy të opinionit serb, Ish-Shefin e Policisë së Beogradit, Marko Nicoviç. Edhe Nicoviç tha për “Kurir” se fakti që presidenti i Serbisë është përgjuar tregon se ekzistojnë qendra që janë jashtë strukturave zyrtare të sigurisë ndonëse çdo fëmijë në këtë shtet kriminal e din se me përfundimin e luftës në Kosovë dhe vdekjen e Sllobodan Millosheviçit, krimi e drejton këtë vend.

“Presidenti ka mbrojtje elektronike, pra këtë e ka bërë dikush që ka teknikë më të fuqishme. Shërbimet duhet ta hetojnë se çfarë ka ndodhur, jo vetëm sa i takon mbrojtjes teknike. Duhet të ketë epilog, duhet të zbulohet kush u fut në sistem dhe të procedohet penalisht. Kjo është vepër e rëndë penale. Natyrisht, shtrohet pyetja se kush e porositi dhe kush e organizoi,” tha Marko Nicoviç, ky njohës i mirë i krimit që si Orhan Dragash kishin frikë të zënë në gojë edhe shërbimet ruse që kontrollojnë çdo kontakt perëndimor të liderëve serb duke përfshirë këtu dhe Vuçiçin ndërsa kanë në qytetin e Nishit, qendrën më të madhe të spiunazhit në Ballkan.