Ndodhë edhe kjo, KPK konfirmon në detyrë Gjyqtaren e Apelit të Tiranës, Edlira Petri
Të jeshë i ndarë ligjërisht nga prindërit prej vitit 1997, por të vazhdosh të jetosh së bashku me ta deri kur lidhë kurorë është moment që Komisioni i Pavarur i Kualifikimit edhe e kupton për të arsyetuar një shtesë pa leje prej 85 metra2 të gjyqtares kur quhet Edlira Petri ndonëse KPK ka shkarkuar gjyqtar për gjëra shumë më banale.
Trupa gjykuese e përbërë nga Roland Ilia kryesues, Valbona Sanxhaktari relatore dhe Xhensila Pine anëtare, pasi e hetuan në të tri kriteret: deklarimit të pasurisë, pastërtisë së figurës dhe profesionalizmit, vendosën ta konfirmojnë Gjyqtaren e Apelit të Tiranës, Edlira Petri.
Gjetjet e KPK-së gjatë seancës dëgjimore u fokusuan tek pasuritë e bashkëshortit të Petrit, Sokol Sadushi, tashmë anëtar i Gjykatës së Lartë.
Komisioni nuk identifikoi probleme në pasuritë e zotëruara 100% nga gjyqtarja Petri, konkretisht për një autoveturë tip Benz të blerë në vitin 2009 në vlerën 600 mijë lekë, depozitat bankare dhe llogaritë rrjedhëse në emër të saj. Relatorja Sanxhaktari tha gjithashtu se subjekti ka pasur burime të mjaftueshme për shkollimin e vajzës së saj në një institucion arsimor jo-publik.
Hetimi është shtrirë gjithashtu edhe mbi shtëpinë e prindërve të gjyqtares, e deklaruar prej saj si adresë banimi në vitet 2003-2009. Sipas relatores Sanxhaktari, ka mospërputhje në dëklarimin e një shtese prej 85m2, që sipas ALUIZNI-t ishte ndërtuar në vitin 2006.
Sanxhaktari tha se subjektit të rivlerësimit i është kaluar barra e provës lidhur me shtesën në apartamentit e prindërve dhe se Petri ka shpjeguar se nuk ka lidhje me këtë gjë pasi nuk i është marrë mendim nga prindërit. Ajo ka deklaruar se ka qenë e ndarë ligjërisht nga prindërit prej vitit 1997, por se ka vazhduar të jetojë së bashku me ta deri kur ka lidhur kurorë.
Por Komisioni i Pavarur i Kualifikimit nuk çudit dynjanë vetëm me Edlira Petrin. KPK ka konfirmuar edhe gjyqtaren e Gjykatës së Apelit Tiranë, Elona Stavri Toro.
Në seancën dëgjimore ajo u përball me pyetjet nga KPK lidhur me blerjen e një apartamenti 135 mijë euro në Rrugën e Elbasanit që i justifikoi me paratë e babait të saj dhe një hua prej 45 mijë eurosh.
Për ata që nuk e kuptojnë KPK-në dhe vettingun e Edi Ramës duhet sqaruar se Elona Stavri Toro është gruaja e Alban Toros i cili është anëtar i Këshillit të Lartë Gjyqësor. Dhe jo vetëm kaq! Elona Toro ka 16 vjet punë si gjyqtare në Gjykatën e Tiranës dhe në vitin 2016 kaloi në Apelin e Tiranës.
A ishte Gjykata e Apelit gjykata më kriminale para Reformës në Sistemin e Drejtësisë ?! Padyshim që ishte edhe pse Reforma në Drejtësi po konfirmon tjetër gjë! Urojmë të paktën që kjo Reformë të ketë ulur çmimet e shërbimit të gjyqtarëve në këtë Gjykatë, për të cilat shërbime qytetarët janë detyruar të marrin edhe kredi!
