Ndodh edhe kjo! Ndaluan trenat në Spanjë, hajdutët vodhën kabllot e bakrit

Një pjesë e trenave me shpejtësi të lartë në Spanjë ndaluan të dielën në mbrëmje pasi hajdutët vodhën kabllot e bakrit, duke lënë shumë pasagjerë të bllokuar gjatë natës në trena dhe mijëra të bllokuar në stacionet hekurudhore. Hajdutët vodhën kabllo në katër zona brenda një rrezeje prej 10 kilometrash.

Ministri i Transportit, Oscar Puente, tha përmes rrjetit social X se bëhet fjalë për një sabotim serioz. Lëvizja e trenave në linjat e prekura u pezullua të dielën në mbrëmje.

Sot në mëngjes, disa trena u nisën nga Madridi për në Toledo, 70 kilometra në jug, por linjat për në qytete si Sevillea dhe Malaga janë ende të pezulluara, njoftoi operatori shtetëror i infrastrukturës hekurudhore ADIF përmes rrjetit social X.

Punonjësit e ADIF po punojnë për të zëvendësuar kabllot e vjedhura dhe për të rivendosur trafikun. Mijëra njerëz kanë mbetur të bllokuar në stacionin Atochi të Madridit. Nëntë trena mbetën të bllokuar midis stacioneve dhe shumë pasagjerë u detyruan të kalonin natën në trena, raportoi televizioni shtetëror TVE. Incidenti ndodhi pasi i gjithë vendi mbeti pa energji elektrike javën e kaluar, duke shkaktuar pezullimin e trafikut hekurudhor.