Ndodhë edhe kjo! Në epiqendër të tërmetit në Turqi ka qytet pa të vdekur dhe asnjë pallat të rrënuar!

Sot kur në Turqi dhe Siri numri i të vdekurve nga tërmeti shkatërrimtar i 6 shkurtit ka kaluar mbi 41 mijë persona, kur mbi 100 mijë janë të plagosur dhe qindra mijëra ndërtesa janë të pabanueshme, në epiqendër të tërmetit është një qytet me asnjë pallat të rrënuar dhe asnjë të vdekur!

Fjala është për qytetin e Erzin me 42 mijë banorë në rajonin Hatay, ku janë dëmtuar pak vetëm disa shtëpi private dhe minare të xhamive ndërsa kryebashkiaku i këtij qyteti, Okkeş Elmasoglu, duke i shprehur ngushëllime familjarëve që janë goditur nga ky tërmet shprehet.

“Nuk kemi rrënoja, të vdekur ose të lënduar nga tërmeti,” thotë Okkeş Elmasoglu duke dhënë arsyet e këtij bilanci pas tërmetit më më vdekjeprurëse që nga themelimi i Turqisë, 100 vjet më parë.

“Nuk kam lejuar ndërtim pa leje në çfarëdo lloj kuptimi. Përkundër kësaj, disa kanë bërë përpjekje. Ndonëse në fillim nuk kishim mundësi ti përcjellim sepse nuk kishim personel të mjaftueshëm, më vonë i kemi paditur te prokurori dhe ato objekte janë shembur,” tha kryebashkiaku, raporton Hurriyet Daily, duke shtuar se shumica e pallateve në këtë qytet janë relativisht të ulëta, nga katër deri në gjashtë kate.

Në Turqi, vlerëson Elmasoglu, duhet të ndryshoj plotësisht mënyra e të menduarit kur është fjala te ndërtimet.

“Për këtë është e nevojshme që qytetarët tanë të mos presin kurrëfarë favore nga shteti për ndërtimet pa leje, që mos të merren me gjëra të këtij lloji dhe të ndërmerren hapa vendimtar që objektet pa leje të shemben nëse është e nevojshme,” shprehet kryetari i Bashkisë Erzin, Okkeş Elmasoglu duke përfunduar:

“Duhet të ketë mekanizma kontrolli në mënyra që gjërat të funskionojnë vaj!”