Ndodhet jashtë shtetit, Albin Kurti nuk intervistohet nga Prokuroria Speciale
Zëdhënësja e Prokurorisë Speciale të Kosovës, Liridona Kozmaqi Hajdari, e ka konfirmuar që Kryeministri Albin Kurti nuk do të paraqitet sot për intervistim në cilësinë dëshmitarit në këtë Prokurori.
Nga Qeveria e Kosovës, tha ajo, janë njoftuar se Kryeministri nuk mund të paraqitet sot për intervistim pasi që ndodhet për vizitë zyrtare jashtë shtetit.
Kryeziu: Prokuroria Speciale ishte njoftuar
Nga ana tjetër, Zëdhënësi i Qeverisë së Kosovës, Përparim Kryeziu, tha se Prokuroria Speciale, përkatësisht prokurorët e rastit janë njoftuar se për shkak se Kryeministri është jashtë shtetit me agjendë të konfirmuar kohë më parë, ai nuk mund të jetë i pranishëm sot sipas ftesës së Prokurorisë.
Megjithëkëtë, sipas tij, Kryeministri Kurti ka shprehur gatishmërinë t’i mirëpres prokurorët e rastit në zyrën e tij në një ditë dhe orë të dakorduar nga të dy palët për të përmbushur kërkesën e dalë nga ftesa e Prokurorisë Speciale.
Ndryshe Kryeministri i Kosovës, Albin Kurti, ishte thirrur sot për të dëshmuar në Prokurorinë Speciale. Kurti pritej të dëshmonte për rastin e rezervave shtetërore, në të cilin është përmendur edhe ministrja Rozeta Hajdari. Kjo ftesë i është dërguar Kryeministrit më 12 dhjetor.
