Ndryshim në procedurat për ndërtimet, Edi Rama paralajmëron gjoba dhe burg

Kryeministri Edi Rama ka bërë të ditur sot masat që do të merren në lidhje me dhënien fund të ndërhyrjeve të paligjshme në territor, ndërsa përsëriti edhe një herë se arkitektët do të ngarkohen me përgjegjësi për çdo devijimin nga zbatimi i projektit.

Duke njoftuar si risi edhe formalizimin e mënyrës së njoftimit, duke vendosur rregulla të detajuara për institucionet përpara çdo nisje punimi, Edi Rama foli dhe për masat, gjobat dhe burgun për ata që nuk i respektojnë këto rregulla.

“Kjo konferencë ka një vlerë të posaçme për këtë moment të rrugës tonë. Ka një vlerë të posaçme për të njohur publikun me të gjitha aspektet e masave që qeveria ka ndërmarrë dhe që një pjesë e tyre kanë marrë fuqi ligjore. Një pjesë tjetër do të dalin për konsultim publik, pasi lidhen me kodin penal.

Tërësia e këtyre masave lidhet me atë që e kam paralajmëruar, domosdoshmërinë e ngritjes në një nivel tjetër për ministrat, për t’i dhënë fund ndërhyrjeve të paligjshme në të gjithë territorin. Kjo është një qasje 360 gradë që shtrihet në të gjitha drejtimet e konstatuara problematike,” tha Edi Rama i bindur se kjo do të japë rezultate të konsiderueshme.

“Pasi krijon kushtet për një disiplinim të mëtejshëm të procesit të ndërtimit. Jo vetëm ndërtimet pa leje, por dhe ato me leje që rëndon bëhen shkak për njerëzit që paguajnë për të blerë një shtëpi dhe hasin pengesa,

Duke filluar nga rritja e garancisë së zbatimit të projekteve arkitekturore, përmes përfshirjes së detyrueshme të arkitektit në zbatimin e punimeve. Kjo do të thotë se për shkak se arkitektët janë nën trysni nga ndërtuesit dhe nuk janë subjekt i ligjit, kemi parë deformime në procesin e ndërtimeve. E kthejnë arkitektin në subjekt të ligjit.”

Mes shumë paralajmërimeve, Kryeministri Edi Rama tha se të gjithë ata punonjës që kanë për detyrë që të kontrollojë hapësirat publike dhe evidentimin e ndërtimeve pa leje, do të përballen me një seri masash, nga shkarkimi deri te procedimi.

“Ndërkohë që në territor leja është shkelur rëndë, në Bashki aktet e konstatimeve janë në rregull, për këto raste, masa për këta punonjës, është shkarkim nga detyra, ndjekje penale dhe mosqënia më pjesë e administratës,” tha sot Kryeministri Edi Rama dhe nuk u nda dot nga qytetarët pa ju përmendur dhe premtimin “brug”.

“Do të ketë masa me burg, nëse ndërtoni pa leje, apo dhe bëni një parkim të jashtëligjshëm. Burgimi është më i gjatë nëse ndërtoni në vendet që janë nën mbrojtjen e shtetit. Dhe në rastet kur ndërtimet pa leje bëhen nga punonjës të shtetit, apo ka bashkëpunime nga ata që duhet t’i ruajnë këto territore, dënimi është i gjatë.”

Ndryshe, në prezantimin e ndryshimeve në procedurat për ndërtimet, Kryeministri Edi Rama ishte i shoqëruar nga ministrja e Punëve të Brendshme, Albana Koçiu dhe ministrin e Drejtësisë, Besfort Lamallari.