Ndryshimet në Draftligj/ Çdo sipërmarrës turistik, detyrim të afishojë listën e çmimeve

Ankesat e shumta të çmimeve, që shpesh bëhen virale në rrjetet sociale nga pushuesit e pakënaqur apo të habitur, duket se kanë shërbyer si një stimul për të vendosur detyrimin e transparencës në një nen të veçantë të draftligjit të turizmin.

I nxjerrë për konsultim një ditë më parë nga Ministria e Turizmit dhe Mjedisit, Drafti parashikon një Nen të ri 64/1 i cili parashikon në katër pika detyrime të tjera për sipërmarrësit turistikë.

Pika dy e këtij Neni kërkon që çdo strukturë akomoduese, operator turistik apo agjenci udhëtimi e stacion plazhi ekspozon dukshëm listat e çmimeve për produktin dhe shërbimin që ofron në gjuhën shqipe dhe angleze.

Një tjetër pikë sanksionon se çdo sipërmarrës turistik ekspozon në vend të dukshëm për publikun emrin e biznesit, si dhe procedurën e ankimit, në gjuhën shqipe dhe angleze.

Pika e tretë vijon me ofrimin e standardeve të shërbimi. “Çdo sipërmarrës turistik, gjatë ushtrimit të veprimtarisë garanton sigurimin e standardeve të shërbimit që ofron, në përputhje me dispozitat ligjore në fuqi”.

Në pikën katër përfshihet nevoja për një kontratë sigurimi për sigurimin e përgjegjësisë ndaj palëve të treta duke përfshirë në këtë pjesë kompanitë e sigurimit.

“Çdo sipërmarrës turistik, gjatë ushtrimit të veprimtarisë duhet të ketë një kontratë të vlefshme sigurimi për sigurimin e përgjegjësisë ndaj palëve të treta si rezultat i mospërmbushjes së detyrimeve, përfshirë aftësinë paguese dhe falimentimin.

Kontrata e Sigurimit lidhet me një shoqëri sigurimi, në përputhje me dispozitat e parashikuara nga legjislacioni në fuqi për sigurimet dhe risigurimet si dhe mbulon dëmet e parashikuara më sipër, si dhe ato të parashikuara në kuadrin ligjor për mbrojtjen e konsumatorit” thuhet në dokument.

Shqipëria po shënon gjatë këtij viti një rekord historik sa i takon numrit të vizitorëve duke regjistruar deri në fund të gushtit një shifër prej 7.1 milionë ndërkohë që në një takim me bizneset Kryeministri nënvizoi se në shtator janë edhe 1.1 milionë vizitorë të tjerë që kanë hyrë në vendin tonë.

Ekspozimi i Shqipërisë ndaj një numri të lartë vizitorësh dhe të kthyerit në një vend viral në rrjete sociale nga bloger dhe influencer nxori në pah një numër të madh adhuruesish, ashtu si edhe personash që e kryqëzonin atë për çmimet dhe shërbimin.

Nga ana tjetër, efekti i turizmit në konsum apo në ekonomi është bërë pjesë e debatit, duke nënvizuar në disa raste nga aktorë të ndryshëm se rritja e dukshme e vizitorëve nuk ka dhënë ndikimin e pritur në gjithë zinxhirin ekonomik të industrive mbështetëse.

Të gjitha këto situata që po vijojnë që prej muajve të parë të vitit kur u duk qartë trendi në rritje i turizmit në vend duket se kanë shërbyer për reflektimin dhe nevojën e ndryshimeve në ligjin për turizmin drafti i të cilit është në konsultim./Monitor/