Ndryshimet në Kodin Rrugor, sa do jenë gjobat për celularin në timon, alkoolin, parakalimet…

Me qëllim të rritjes së Sigurinë Rrugore, Policia e Shtetit sjell dhe propozimet kryesore për ndryshime të Kodit Rrugor ku gjobat pritet të trefishohen. Kështu, gjoba do të vendoset për shoferin nëse në mjetin e tij gjenden pasagjerë që nuk e kanë vendosur rripin e sigurimit.

Gjoba për parakalimet nga 1-3 mijë lekë bëhet 5-10 mijë lekë dhe nëse shkelja përsëritet dy herë brenda vitit, dyfishohet gjoba dhe pezullohet leja e drejtimit për një muaj.

Një tjetër ndryshim i propozuar është gjoba 10-20 mijë lekë dhe heqje 5 pikë nga leja e drejtimit kur shoferi nuk ruan distancën e sigurisë dhe ushtron presion me sistemet e ndriçimit në rrugë interurbane kryesore e dytësore.

Gjithashtu nëse drejtuesi i mjetit konstatohet me pije alkoolike, nga ora 19:00-06:00, gjoba është 30% më e lartë.

Sa i takon përdorimit të celularit në timon, gjoba rritet nga 1-1.5 mijë lekë, në 5-15 mijë lekë. Dhe nëse shkelja përsëritet 3 herë brenda vitit, dyfishohet gjoba si dhe leja e drejtimit pezullohet për 3 muaj bashkë me zbritjen 10 pikë.

Në këtë pikë, shtohet në penalizimet e Kodit Rrugor edhe gjoba kur telefonin polici ta sheh në dorë, duke folur apo duke shkruar mesazh.

Sa i takon “testit të idiotit“, në Kodin Rrugor shtohet: Për shkelje të rënda të normave të sjelljes të përsëritura gjatë drejtimit të mjetit, Policia detyron drejtuesin e mjetit të kryejë vizitë mjekësore (test psikologjik) për të dëshmuar aftësitë e tij, për lejimin e mbajtjes dhe përdorimit të lejes së drejtimit.

Të lumtur nuk duhet të jenë më ata që policia i falë për gabimin e bërë por shumë të kujdesshëm. Për disa kategori shkeljesh është parashikuar “këshillimi” por ai do të administrohet nga policia dhe nëse shkelja përsëritet brenda një viti ai do të ndëshkohet me gjobën maksimale.

Ndryshe, Policia e Shtetit pretendon se me marrjen e këtyre masave dhe vendosjen e gjobave do të disiplinohen shoferët në rrugë dhe do të ulet numri i aksidenteve.