Ndryshimet në Statut, Komisioni Rithemelimit PD i depoziton në gjykatë

Komisioni për Rithemelimin e Partisë Demokratike sot ka depozituar në gjykatë ndryshimet në Statutin e PD të cilat u miratuan në Kuvendin Kombëtar të 11 Dhjetorit.

Ndryshimet janë depozituar nga anëtarët e Komisionit të Rithemelimit të PD, Ivi Kaso dhe Arben Ristani.

Ndërkohë anëtari i Komisionit të Rithemelimit të PD, Oerd Bylykbashi, ka paralajmëruar se gjykata do të regjistrojë ndryshimet e 11 Dhjetorit, pasi janë të gjitha dokumentet dhe provat për pranimin e tyre.

“Pse Basha nuk i ka regjistruar ndryshimet në korrik? Shikoni çfarë respekti ka Basha. Me ndryshimet e datës 11 dhjetor ne shfuqizojmë atë statut, nuk themi që nuk ekziston, aq më mirë që e kanë regjistruar. Do ishte absurditet ta çonte pasi e kishim çuar ne. Ne nuk bëjmë padi për statutin e korrikut. Gjykata vetëm e regjistron,” tha Oerd Bylykbashi duke përfunduar:

“Gjyqtari duhet të gjejë kushte ligjore apo statutore që nuk e pranon, por Kuvendi është thirrur nga 1/4 e delegatëve. Kemi verifikuar faktin që është thirrur nga ata dhe dokumentacioni është disponibël për gjykatën. Të gjitha provat i kemi dhe është e kundërta e kuorumit që ka bërë Basha me 17 korrik, në sallën e Pallatit të Kongreseve,” tha anëtari i Komisionit të Rithemelimit të PD, Oerd Bylykbashi, duke e përsëritur edhe sot se kanë vendosur një precedent historik jo vetëm për Partinë Demokratike.