Ndryshon buxheti, qeveria akordon një fond për shpërblimet e pensionistëve/ Ja sa përfitojnë

Qeveria miratoi në mbledhjen e djeshme Aktin Normativ me ndryshimet e buxhetit të vitit 2018. Ndryshimet e buxhetit vijnë pas goditjes që i kanë dhënë të ardhurave doganore zhvlerësimi i euros.

Referuar neneve të Aktit Normativ, qeveria ul parashikimet vjetore për arkëtimin e të ardhurave, shpenzimet e përgjithshme, ndërsa mban të pandryshuar deficitin buxhetor.

Me Aktin Normativ, qeveria miratoi edhe fondin prej 3 miliardë lekësh për bonusin e pensionistëve. Fondi për shpërblimet e pensionistëve u krijua nga rritja e arkëtimeve të sigurimeve shoqërore dhe shëndetësore, çka ka sjellë qe edhe të ardhurat e sigurimeve të rishikohen me rritje 2 miliardë lekë.

Nga ndryshimet e buxhetit preken edhe punonjësit e administratës, ku për këtë kategori qeveria nuk parashikon rritje të pagave. Në Aktin Normativ qeveria ka shfuqizuar nenin 14, ku parashikonte fondin prej 1 miliard lekësh për rritje pagash.

PENSIONISTËT

E kthyer në traditë, pensionistët edhe për këtë vit do të përfitojnë shpërblim për festat e fundvitit. Me ndryshimet e miratuara nga qeveria, të buxhetit 2018, është përfshirë edhe fondi për shpërblimet e pensionistëve.

Në Aktin Normativ qeveria e ka quajtur “transferta për bonusin e pensionistëve”, ku pritet që për fundvit në tërheqjen e shpërblimit të përfshihen edhe shtresat e tjera në nevojë, apo siç njihet ndryshe paketa e solidaritetit.

Krijimi i fondit për pensionistët është mundësuar nga rritja e arkëtimeve të kontributeve, çka ka sjellë që qeveria të rrisë parashikimet vjetore për arkëtimin e të ardhurave për kontributet e sigurimeve shoqërore dhe shëndetësore me 2 miliardë lekë, nga 120,2 miliardë lekë që ishin në buxhetin fillestar, në 122,2 miliardë lekë me ndryshimet e muajit korrik.

Referuar edhe të dhënave fiskale të Ministrisë së Financave, arkëtimi i të ardhurave nga kontributet e sigurimeve për 6-mujorin ishte me rritjen më të lartë, në krahasim me taksat e tjera.

TË ARDHURAT DHE SHPENZIMET

Qeveria ka ulur edhe parashikimet vjetore për arkëtimin e të ardhurave dhe shpenzimeve, ndërsa ka mbajtur të pandryshuar deficitin buxhetor në 32,3 miliardë lekë. Konkretisht, referuar ndryshimeve, parashikimet për totalin e të ardhurave, që do të arkëtohen deri në fund të vitit, janë ulur me 4 miliardë lekë, nga 357,4 miliardë lekë që ishte në buxhetin fillestar në 353,3 miliardë lekë në Aktin Normativ. Rënia e euros iu ka dhënë goditje të ardhurave doganore, ku, sipas statistikave të 6-mujorit, humbjet në buxhet llogariten me 3,6 miliardë lekë. Zhvlerësimi i euros detyroi qeverinë të ulë edhe parashikimet në mbledhjen e të ardhurave. Po ashtu për të ruajtur parametrat e buxhetit, qeveria ka ulur edhe shpenzimet e përgjithshme me 4 miliardë lekë nga 389,8 miliardë lekë që ishin në buxhetin fillestar në 385,7 në Aktin Normativ. Deficiti buxhetor ka mbetur i pandryshuar. Për shpenzimet kapitale apo siç njihen ndryshe fondet për investime, qeveria nuk ka miratuar shkurtim fondesh, por vetëm rialokim të tyre nga projektet me perfomancë të ulët, tek ato me realizim më të lartë. /Panorama/