Në 185 vjetorin e lindjes, patrioti Ali Ibër Nezaj vjen i përjetësuar në shtatore

Në 185 vjetorin e lindjes dhe 120 vjetorin e vdekjes, sot në Bajram Curr vjen i përjetësuar në shtatore, Zv/Komandanti i Forcave të Armatosura të Lidhjes Shqiptare të Prizrenit, Ali Ibër Nezaj

Duke e përshëndetur në emër të Presidentit Ilir Meta, këtë takim me vlera për historinë kombëtare, Këshilltari i Presidentit të Republikës, Flamur Gashi u shpreh:

E dashur familje e Ali Ibër Nezaj,
Të dashur motra dhe vëllezër të Tropojës,
Të nderuar miq e të ftuar nga Shqipëria, Kosova, Mali i Zi, Lugina e Preshevës, Maqedonia e Veriut e Diaspora

Sot, Tropoja – Malësia e Gjakovës, e përkujton patriotin e shquar Ali Ibër Nezaj me një ngjarje të shënuar, me zbulimin e shtatores së tij në qendër të qytetit, përkrah me monumentin e Heroit të Popullit, Plakut të Maleve Bajram Curri, shtatores së Heroit të Demokracisë e djalit të Tropojës Azem Hajdari, bustit të Heroit të Popullit Asim Vokshit.

Tropoja – Malësia e Gjakovës, i dha figura të shquara Lidhjes Shqiptare të Prizrenit, si Heroi i Popullit Mic Sokoli, Haxhi Zekë Byberaj, Ali Ibër Nezaj, Binak Alia, Prelë Tuli, Bek Din Bajraktari i Shipshanit, Halil Brahim Bajraktari i Gashit, Mal Dul Bajraktari i Bytyçit dhe shumë heronj e dëshmorë, duke qënë një bazë e fortë mbështetëse, një forcë mbrojtëse e goditëse luftarake e Lidhjes, për idealet e Programin e saj Kombëtar.

Lidhja Shqiptare e Prizrenit (1878-1881) është një nga faqet më të ndritura në historinë kombëtare shqiptare, së bashku me Epokën e Heroit tonë Kombëtar Skënderbeut, Shpalljen e Pavarësisë së Shqipërisë, pjesëmarrjen e kontributet shqiptare në Luftën e Parë e të Dytë Botërore dhe në Luftën e fundit të Kosovës.

Lidhja Shqiptare e Prizrenit është e lidhur ngushtë edhe me emrin e Ali Ibër Nezajt, që nga themelimi i saj, kur u zgjodh në forumet më të larta drejtuese – në Këshillin e Përgjithshëm dhe Komitetin Kombëtar, pastaj dhe Zv/komandant i Forcave të Armatosura në Qeverinë e Përkohshme të LSHP e deri më fund prilli e maj 1881 kur kulla e tij në Buçaj të Shipshanit të Tropojës ishte “selia e fundit e Lidhjes Shqiptare të Prizrenit”, pasi aty u strehuan ndër të vetmit drejtues të saj kryesorë të mbetur të Lidhjes, si kryetari i Lidhjes, Ymer Prizreni, si dhe komandanti Sylejman Vokshi.

Të gjitha luftërat e drejtuara nga Lidhja Shqiptare e Prizrenit janë të lidhura edhe me emrin e njërit prej drejtuesve elitarë të saj, me patriotin e shquar Ali Ibër Nezaj, pasi ai ishte një ndër drejtuesit e pushkët e para në “Aksionin e Gjakovës” (shtator 1878); pasi ai ishte një ndër drejtuesit e një prej luftërave më historike të kombit tonë- Beteja e Nokshiqit në Plavë-Guci (dhjetor 1879-janar 1880); pasi ai ishte zv/komandant i betejave të Lidhjes në Shtimje e Slivovë (prill 1881), ku dhe mori plagë lufte.

Si rilindas i vërtetë, Ali Ibër Nezaj, me veprimtarinë e tij politike, diplomatike, ushtarake, humanitare; me rreshtimin e tij në krahun më patriotik të Lidhjes Shqiptare të Prizrenit, me vendosmërinë e tij në mbrojtje të Çështjes Kombëtare Shqiptare si në Takimin në Qafë Çakorrit me palën malazeze (1879); me rolin e tij për Të Drejtat e Njeriut (mbrojtjen e të krishterëve shqiptar e harmoninë fetare); me mos pranimin e tij nga Porta e Lartë as titullin “Pashë” dhe as dekoratat e pushtuesit; mbetet një ndër figurat më të shquara të Kombit Shqiptar që luftoi për Shtet e Komb Shqiptar të bashkuar në të katër vilajetet.

Tropoja e vlerave, e visareve kombëtare, e pasurive natyrore, turistike e kulturore, përgjatë gjithë historisë së saj në ngjarje madhore të Kombit Shqiptar, që nga Lidhja Shqiptare e Prizrenit e Shpallja e Pavarësisë dhe deri në Lëvizjen Demokratike të Dhjetorit ’90, ka dëshmuar se një nga pasuritë më të mëdha të saj i ka figurat e veta historike që e kanë shkruar emrin e tyre në historinë kombëtare shqiptare, në momentet me vendimtare për të ardhmen e kombit.

Ne, të gjithë, sa herë flasim për emrin e veprimtarinë kombëtare të Ali Ibër Nezajt, edhe më me krenari i themi vetvetes, kohës e botës: “Jam Shqiptar !”.

Lavdi emrit e veprës së patriotit të shquar Ali Ibër Nezaj!

Nderim për popullin e Tropojës!