Në 5 vjetorin e Marrëveshjes Rama-Basha, Balla: Dakord, ulemi që sot! Alibeaj: Nuk kemi kushte

Në 5 vjetorin e Marrëveshjes së turpshme në mes të Kryetarit të PD, Lulzim Basha, dhe atij të PS, Edi Rama e cila mbylli çadrën por dhe demokracinë shqiptare për të mos u kthyer më kurrë, sot qytetarët e Shqipërisë kishin rastin të dëgjojnë dakordësi në mes të këtyre palëve ndonëse është e qartë se nuk është asgjë më shumë se maskaradë për zgjedhjen e Presidentit të Republikës që drejtohet nga të deleguarit e dyshes kriminale Rama-Basha, Taulant Balla dhe Enkelejd Alibeaj.

Emra konkret nuk ka por sot në Konferencën e Kryetarëve u vendos që 23 maji të jetë data për zhvillimin e raundit të dytë të procesit për zgjedhjen e Presidentit të Republikës ndërsa dokumentacioni mund të dorëzohet deri më 22 maj ora 16:00; Deri sa mbledhja e Komisionit të Ligjeve do të jetë në datën 23 maj ora 10:00 dhe pasdite në orën 18:00 do të zhvillohet seanca plenare e parlamentit.

Ishte Kryetari i Grupit Parlamentar të PS-së, Taulant Balla, që propozoi 23 Majin si datë për zhvillimin e raundit të dytë për zgjedhjen e Presidentit dhe nuk e kundërshtoi njeri:

“Propozoj që raundi i dytë të zhvillohet të hënën në 23 maj në orën 18:00. Ky është propozim që biem të gjithë dakord,” u shpreh Taulant Balla dhe ndonëse nuk është 17 Maji 2017 palët ishin dakord pa diskutim.

Ndryshe, dje u konsumua raundi i parë i zgjedhjes ku as mazhoranca dhe as opozita nuk iu drejtuan Parlamentit me një emër.

Për ata që kanë nostalgji për 17 Majin 2017 mund të ndiqni debatin e zhvilluar në Konferencën e Kryetarëve i cili është ndryshe nga deklaratat publike, aty ku krijohet ideja se ka mazhorancë dhe opozitë. Jo, janë një Ndërmarrje!

Mediu: PD dhe kjo opozitë ka një histori 30 vjeçare që ka bërë krenarë shumë shqiptarë dhe nuk mund të quhet histori 30 vjeçare skutash. Ka pasur momente të mira dhe të këqija, por përgjithësimi sikur politika e fillon sot për herë të parë nuk i shërben këtij Kuvendi. Do ishte mirë që të mos bëjmë përgjithësime të atyre çfarë kanë kaluar më parë. Kemi pasur angazhimin në momente të vështira politike për të treguar edhe atë që thatë ju në raport me manipulimin e zgjedhjeve. I kemi mbushur mendjen partnerëve se kush është më e mira për vendin. Kriteret në fund do të vijnë te emrat. Në deklarimet që bëni që keni maxhorancën për mua është anti-kushtetuese, është farsë. Shqetësimi im është raporti që ndërtojmë me Kushtetutën dhe qytetarët shqiptarë.

Balla: I dëgjova me vëmendje kolegët e opozitës. Propozoj që raundi I dytë të zhvillohet të hënën në 23 maj në orën 18:00. Ky është propozim që biem të gjithë dakord. Kemi marrë një letër nga Alibeaj që është bërë publik shumë kohë më parë. Doni ta diskutojmë dokumentin këtu? Hajde ta diskutojmë. Të drejtën grupit parlamentar të PS-së për të propozuar emra nuk ia hiqni dot dhe nuk ia vendosni dot kusht. Për këtë gjë të biem dakord tani. Kjo nuk bëhet me letra, ço ti letër, letra vjen me postë pas 3 ditësh. Pastaj ta marrim, të kthejmë ne përgjigje, jo po erdhi letra, jo po nuk erdhi letra. Me grupin e Mediut jemi ulur dy herë. Ka pasur propozime me vlerë edhe me Mediun, edhe me Dodën. Në fund pastaj do diskutosh për emra. Si I bëhet kjo që ju nuk na lini ne të propozojmë. Kur të ulemi në tryezë t’i thua “unë nuk jap emra se ti tallesh me emrat e mi”. më pëlqeu metafora e Gjekmarkajt, Berisha dhe Meta nuk zgjedhin më president. Vendimi që ka marrë grupi i PS është që nuk mund të jetë nga grupi jonë Presidenti, ne nuk duam një President të PS-së. duam një president të të gjithë shqiptarëve.

Hajde ulemi me të gjitha grupet. Doni pak kohë? E lëmë për pasdite ose për nesër. Jemi gati të ulemi kur të doni ju për të diskutuar çfarëdolloj diskutimi që doni ju. E fillojmë nga kriteret po të doni. Por duhet një proces që të çojë te emrat sa më shpejt. Nëse ju e konsideroni si “patate te nxehtë” dhe nuk doni të merreni, tani kemi hyrë në numërimin mbrapsht. Në datë 30 do jetë raundi tjetër. Por hajde të punojmë me këtë gjë, por me telegrame nuk bëhet,” tha Basha ndërsa Enkelejd Alibeaj tha se Plaforma që ai i ka dërguar Ballës për kriteret dhe formulën për zgjedhjen e Presidentit nuk do të thotë se opozita ka vendosur kushte, ky është vetëm qëdrimi i opozitës, sqaroi Alibeaj.

Alibeaj: Nëse të kam çuar një letër, nuk kam vendosur kushte për asnjë nga ju. Është qëndrimi ynë. Ne duam disa kritere që të  jenë morale. Jo vetëm për vete, por edhe për shqiptarët. Se thoni emra, emra, si te pazari i Roskovecit. Ne do përzgjedhim Presidentin as tuajin, as tonin por të shqiptarëve. Ata që aspirojnë për këtë pozicion duhet të dinë nëse ne që mblidhemi çdo javë a po japim sinjal për të pranuar emra mbi palët? E dimë që i keni 71 votat, ndoshta mezi po prisni raundin e katërt dhe të pestë. Publikisht ta dëgjojnë njerëzit, ta dinë për çfarë vlerash jemi ne. dekriminalizimi, jo shantazh ndaj korrupsionit, të ketë treguar në të shkuarën që di të qëndrojë, që të ketë treguar vlerat më të mira të këtij vendi, anti komunist, kushdo që i dëgjon këto kritere, pavarësisht se mund të duken si lojë fjalësh, është orientimi se si do të sintetizojmë ne votën tonë nëse vjen. Meqë u përgjëruat se doni pjesëmarrjen e opozitës, ja e keni ofertën tonë të shkruar, të çuar me postë. Mund të duket naivitet, por ky është një proces që i përket 3.5 milionë shqiptarëve. Me kulisa e pazare kishim zgjedhur 7 presidentë në të shkuarën.

Balla: Proces me letra nuk bëhet! Ashtu! E para sepse ne ja ku e kemi mundësinë që të takohemi, të flasim, sikurse po ju them se edhe atë dokument që keni propozuar, ta negociojmë. Por po ju them, se dua të jem korrekt që në fillim të procesit, dhe ju falënderoj që u tërhoqët. Fakti që më jep të drejtë, tregon se kam unë të drejtë. Meqë e thua këtë garanci, jam i gatshëm që të ulemi tani. Shkojmë dhe ulemi diku dhe flasim për atë dokumentin, nëse biem dakord e vendosim dhe firmosim të dy. Dhe më pas shkoni te grupi juaj shkoni dhe konsultoni emrat, dhe hajde të konsultojmë emrat. Ky proces i tillë është. Me të të drejtë ai zotëria (Mediu) tha hajde flasim për emrat. Edhe në 2002, edhe në 2012, ka pasur një proces. Unë nuk po vë asnjë kusht. hajde ulemi, shohim të gjitha dokumentet. Të biem dakord për mënyrën se si do bëhet procedura. Flasim me Gjiknurin, me Spiropalin. Hajde flasim te kjo sallë, këtu. Të punojmë intensivisht duke ia vënë vetes si detyrë që ditën e diel, në orën 16:00 të jenë dhe kandidaturat, më pas të hënën të kalojë raundi për votim. Ama kjo gjëja që fshihemi pas shkuarjes dëm të raundeve, nuk na bën nder. Hajde ja ku jemi, do rrimë këtu. Juve ju mjafton.

Pas ofertës së Ballës, Alibeaj u përgjigj pozitivisht, por duke vendosur kushte. Ai theksoi se pranonte që të uleshin në një tryezë për të diskutuar mbi draftin e PD-së për zgjedhjen e presidentit, por në atë sallë ku po mbahej Konferenca e Kryetarëve dhe në prani të kamerave.

Balla: Ejani në orën 18:00, bashkë me negociatorët, dhe ulemi e flasim.

Alibeaj: Duam tani!