Në 6 Dhjetor ora 12:00, Berisha: Të gjithë në Bulevardin “Dëshmorët e Kombit”
Pas paralajmërimit të qeverisë për masat e sigurisë për Samitit e BE-Ballkani Perëndimor që pritet të zhvillohet më 6 Dhjetor në Tiranë, ku Kryeministri Edi Rama ka parashikuar edhe perimetrin e Sigurisë që pamundëson protestën e parashikuar të opozitës, Kryetari i Partisë Demokratike, Sali Berisha, sot e bëri të qartë se çdo demokrat e demokrate e ka për detyrë më shumë se asnjëherë tjetër, të marrë çdo masë dhe të gjendet në 6 Dhjetor, në orën 12:00 në bulevardin “Dëshmorët e Kombit” në Tiranë.
“Të dashur, demokrate e demokratë të degës numër 5 të PD-së, së Tiranës, dhe demokratë të mbarë kryeqytetit dhe mbarë Shqipërisë. Të nderuar miq! Është një kënaqësi e veçantë të ju përshëndes sonte, të ju falënderoj me mirënjohje për praninë tuaj në këtë takim, në prag të një momenti historik për jo vetëm PD-në, por për shoqërinë shqiptare në tërësi.
Momenti është i tillë, pasi në datën 6 dhjetor, mblidhen këtu në Tiranë të gjithë liderët e BE-së dhe Ballkanit Perëndimor në një samit të përbashkët. Dhe ky është një nder i papërsëritshëm për Shqipërinë dhe një përzgjedhje gjeo-strategjike e një rëndësie historike me të cilin Europa Perëndimore i thotë Vladimir Putinit dhe të tjerëve, se Shqipëria është territori ynë dhe harroni se mund të keni ambicie të tjera,” tha Sali Berisha para demokratëve të Degës 5 në Tiranë duke e bërë të qartë se Samiti i 6 Dhjetorit në rrafshin strategjik është në interes madhor për shqiptarët dhe i jep goditjen fatale projektit të Presidentit të Serbisë dhe vaslit të tij Edi Rama, Ballkani i Hapur.
“Në këtë mënyrë, ky Samit në rrafshin strategjik është në interes madhor për shqiptarët dhe i jep një goditje fatale, për të mos thënë përfundimtare projektit të Aleksandar Vuçiç, Edi Ramës dhe vasalit të tij tjetër në Shkup, projekt i Ballkanit të Hapur, i mbështetur haptas nga Lavrov, por duhet të jemi të hapur e të themi të vërtetën, jo më pak nga George Soros dhe pasaardhësi i tij, Aleksis që merr pjesë në çdo samit të kësaj nisme, ruso-serbe. Edhe në këtë kontekst, samiti është shumë i mirëpritur.”
Në 6 dhjetor, tha Kryetari i Partisë Demokratike, ne dalim për t’ju thënë liderëve të Europës, se Edi Rama nuk përfaqëson popullin shqiptar dhe është një armik i të gjitha vlerave evropiane në Shqipëri.
“Po të marrim se pse ne do të jemi në datën 6 në protestë, unë ftoj liderët e BE-së që ta marrin këtë prani, si një përshëndetje dhe nderim ndaj tyre vlerave të tyre. Por kjo është vetëm një anë e medaljes. Ne jemi në rrugë e në shesh për të protestuar kundër armikut të vlerave evropiane në Shqipëri, Edi Ramës dhe regjimit të tij.
Këtu nuk fshehim asgjë, përkundrazi, ne dalim në datën 6 për të ju thënë liderëve të Europës, se ky nuk përfaqëson jo popullin opozitar, por as popullin shqiptar dhe ky është një armik i të gjitha vlerave themelore mbi të cilat është ndërtuar shoqëria. Është armik i votës së lirë të shqiptarëve, është një armik të drejtave të tyre, i identitetit, kulturës dhe pasurive të tyre publike, fondeve buxhetore dhe të ardhmes së tyre.
Në tërë historinë të ardhmen e shqiptarëve nuk e ka vjedhur kush më barbarisht se Enver Hoxha dhe Edi Rama. Dhe me 6 dhjetor, ai që i thotë vetes shqiptar, ai që e ndjen veten shqiptar nuk mund të jetë tjetër, veç në protestë, në protestë të fuqishme kundër Edi Ramës dhe klikës së tij në pushtet,” tha Kryetari i Partisë Demokratike, Sali Berisha, duke përfunduar:
“Çdo demokrat e demokrate, e ka për detyrë më shumë se asnjëherë tjetër, të marrë çdo masë, të bëjë çdo përpjekje që të gjendet në orën 12:00 në bulevardin ‘Dëshmorët e Kombit’ në një protestë të paparë ndonjëherë në historinë e Tiranës.”
