Në Beograd, Boehler: Serbia dhe Kosova, vendosën për popullin jo për politikën!

Marrëveshja e Washingtonit dhe dakordësimet e arritura në Beograd nuk janë vetëm fjalë në letër, por punë të reja për njerëzit që jetojnë në këtë rajon, vende të reja pune dhe zhvillim të sektorit privat, tha I Dërguari i Posaçëm i Presidentit të SHBA, Donald Trump, për Dialogun Kosovë-Serbi, Richard Grenell. Ndërsa Drejtori Ekzekutiv i Korporatës Ndërkombëtare të Financave dhe Zhvillimit në SHBA, DFC, Adam Boehler, gjatë fjalës së tij në Beograd uroi për guximin që Serbia dhe Kosova kanë vendosur për popullin dhe jo për politikën.  

Me këtë rast, Richard Grenell tha se e gjithë kjo nuk do të ishte arritur sikur mos të ishte Presidenti i SHBA, Donald Trump, i cili besonte se diçka tjetër mund të ndodhë.

“Besonte se ekonomia mund të vendos në plan të parë edhe vendet e punës. I janë dhënë premtimet popullit të Serbisë dhe dua që të na konsideroni të përgjegjshëm. Këto nuk janë vetëm fjalë në letër, por punë për njerëzit që jetojnë këtu,” tha Grenell duke sqaruar se ky është një mesazh për qytetarët e Serbisë. 

Presidenti dhe Shtetet e Bashkuara, tha Grenell, besojnë në fuqinë e sektorit privat, që mënyra e të menduarit nga “jashtë” kontribuon që edhe qeveria të kuptoj se në çfarë mënyrë mund të “lulëzoj” sektori privat.

“Simbolika në bisedimet politike kurrë nuk do të mund t’iu paguaj njerëzve qiranë, këtë e bënë sektori privat,” tha I Dërguari i Posaçëm i Presidentit të SHBA, Donald Trump, për dialogun Kosovë-Serbi, Richard Grenell, duke shtuar se ajo që u arrit në Washington duket dhe është një gjë e madhe.

“Simbolika është e rëndësishme, por ka të bëjë me hapjen e vendeve të reja të punës. Populli i Serbisë le të na konsideroj përgjegjës se fjalët në letër nuk mjaftojnë deri sa nuk vjen deri te hapja masive e vendeve të punës, deri tek zhvillimi ekonomik dhe deri sa familjet nuk vendosin që të qëndrojnë në këtë rajon,” tha I Dërguari i Posaçëm i Presidentit të SHBA, Donald Trump, për dialogun Kosovë-Serbi, Richard Grenell.

Boehler: Beogradi dhe Prishtina vendosën për popullin

Drejtori Ekzekutiv i Koorporatës Ndërkombëtare të Financave dhe Zhvillimit në SHBA, DFC, Adam Boehler, pas takimit të përfaqësuesve të Odës Ekonomike të Kosovës dhe atyre të Serbisë, i uroi për guximin që Beogradi dhe Prishtina kanë vendosur për popullin dhe jo për politikën.   

Në Serbi, tha Boehler ka ardhë me pesë Agjenci tjera amerikane. 

“Në delegacionin tonë është fuqia e tërë ekonomike e qeverisë amerikane,” tha shefi i DFC ndërsa sqaroi se normalizimi ekonomik do të thotë investime dhe hapje të vendeve të punës, mundësi që të mendohet se si mund të jetë e ardhmja, në vend se të bllokohemi nga e kaluara

Boehler tha se kjo nuk është një situatë ku një vend fiton dhe tjetri humb, por kemi të bëjmë me një fakt ku të gjithë kanë përfitime dhe kjo u sjell para njerëzve. Me këtë rast, ai rikujtoi se SHBA është njëra ndër shtetet më të fuqishme në botë para së gjithash për shkak të sektorit privat.

“Ky rajon do të rritet dhe do të krijoj mundësi të jashtëzakonshme, e nxitësi i gjithë kësaj do të jetë sektori privat,” tha Boehler.

Çadezh: Grenell ndryshoi mënyrën e zgjidhjes së temave komplekse

Kryetari i Odës Ekonomike të Serbisë, Marko Çadezh tha se I Dërguari i Posaçëm i Presidentit të SHBA, Donald Trump, për dialogun Kosovë-Serbi, Richard Grenell, me sukses arriti të ndryshoj mënyrën e zgjidhjes së temave komplekse dhe zhbllokoi procesin e bashkëpunimit.

“Duke ju falënderuar kësaj, ne sot flasim për biznesin dhe interesat e përbashkëta, dhe jo për atë që na ndanë,” tha Çadezh pas takimit të përfaqësuesve të Odës Ekonomike të Serbisë dhe Odës Ekonomike të Kosovës me Grenellin dhe delegacionin amerikan të DFC, në Amabsadën e SHBA në Beograd.

“Ky është një proces i madh i cili është bllokuar për vite të tëra, dhe kjo mënyrë ka bërë që të ulemi në Washington dhe të nënshkruajmë marrëveshjen,” tha Çadezh duke shtuar se historia do ta kujtoj si moment historik të arritjes së stabilitetit në rajon.

Çadezh nuk harroi ta falënderoj Drejtorin e DFC, Adam Boehler për, siç tha, vizitën e shpejtë në Beograd.

“Kur jemi takuar para dy javësh në Washington, e pyeta se sa shpejtë mund të vijnë, më tha ‘për dy muaj’!”

Kryetari i Odës Ekonomike të Serbisë nuk harroi ta falënderoi edhe Kryetarin e Odës Ekonomike të Kosovës, Berat Rukiqin për bashkëpunimin e mirë për pesë vjet ndërsa tregoi se kanë formuar një ekip të përbashkët për mbështetjen e projekteve, që u jep ekspertiza qeverive.

Ndërkohë Kryetari i Odës Ekonomike të Kosovës, Berat Rukiqi tha se marrëveshja e arritur në Washington më 4 shtator për normalizim ekonomik, është marrëveshje e rëndësishme për Kosovën dhe Serbinë si dhe rajonin e Ballkanit Perëndimor.

“Temat politike nuk kanë dhënë investime dhe hapje të vendeve të reja të punës. Ajo që do të bëjmë ne është të fokusohemi në prioritetet e projekteve të ekonomisë dhe shumë të tjera,” tha Berat Rukiqi.

Përveç Grenellit dhe Boehlerit, në takim ishin edhe Ambasadori i SHBA në Beograd, Anthony Godfrey, Kryetarët e Odave Ekonomike të Kosovës dhe Serbisë, Berat Rukiqi dhe Marko Çadezh, si dhe Presidenti i Odës Ekonomike Amerikane, Zoran Petroviç.

Delegacioni amerikan pritet të takohet me Presidentin e Serbisë, Aleksandar Vuçiç, dhe Kryeministren Ana Bërnabiçnë Pallatin Serbia, ku delegacionet e dy vendeve do të nënshkruajnë Deklaratën e përbashkët.

Arsye kryesore e vizitës së zyrtarëve të lartë amerikanë në Beograd është hapja e Zyrës së DFC në Beograd, përmes së cilës do të realizohen projektet e Marrëveshjes së Washingtonit. Takimet për realizimin e projekteve që do të financohen nga DFC do të vazhdojnë nesër me Ministrin Financave dhe Ministrin e Infrastruktës së Serbisë.