Në Berlin, Kurti: NATO dhe KiE shtyllat e paqes demokratike në Evropë

Kryeministri i Kosovës, Albin Kurti, duke folur në ceremoninë e organizuar nga Partia Socialdemokrate e Gjermanisë, SPD, në Bundestagun gjerman në Berlin, për nder të 75-vjetorit të themelimit të Këshillit të Evropës, KiE, tha se në prill të vitit 1949, u krijuan dy institucione që kanë transformuar historinë evropiane, NATO dhe Këshilli i Evropës, të cilat janë dhe shtyllat e paqes demokratike në Evropë.

“75 vjet nga krijimi i Këshillit të Evropës, 25 vjet që kur NATO, përfshirë Gjermaninë, shkoi në luftë për të mbrojtur dhe shpëtuar qytetarët e Kosovës nga tmerret e masakrave, vrasjeve, përdhunimeve dhe dëbimeve masive. 2024 është viti i duhur që demokracia e fundit në Evropë që nuk është ende anëtare e Këshillit të Evropës t’i bashkohet asaj,” u shpreh Albin Kurti duke nënvizuar se Kosova aspiron dhe punon për anëtarësimin në NATO e Bashkimin Evropian, dhe hapi i parë për bashkimin me demokracitë evropiane është anëtarësimi në Këshillin e Evropës..

“Në këto tri vjet qeverisje, kemi dëshmuar se zhvillimin socio-ekonomik dhe progresi demokratik shkojnë krah për krah. I bëjë thirrje miqve tanë gjermanë që ta mbështesin vendin tonë edhe në këtë hap të fundit të anëtarësimit të plotë në Këshillin e Evropës, si vendi i 47-të anëtar,” tha Kryeministri i Kosovës, Albin Kurti, duke falënderuar me këtë rast Bundestagun dhe SPD për mikpritjen, interesin, mbështetjen dhe rolin kyç në demokratizimin e Evropës dhe për ndihmën e vazhdueshme.