Në bregdetin italian kapen dy ton kokainë
Policia italiane ka bërë të ditur se sot në det, në bregun lindor të Siçilisë, janë kapur dy ton kokainë, vlera e së cilës në treg arrinë mbi 400 milionë euro.
La Stampa raporton se droga ishte mbështjellur në 70 pako të pajisura me sinjalistikë ndriçuese dhe të lidhura me rrjetë.
“Droga ishte në 70 pako me peshën totale prej rreth 2000 kilogramëve. Kjo është njëra prej sasive më të mëdha që janë kapur ndonjëherë në territorin e shtetit tonë. Pakot, në kuadër të aktiviteteve specifike të kontrollit të policisë financiare, u zbuluan nga njësiti ajror-bregdetar. Pas kësaj e realizuan aksionin,” shkruan e përditshmja italiane. Gjithashtu, filloi dhe operacioni i vëzhgimit ajror të gjithë terrenit.
“Kemi verifikuar praninë e pakove të tjera në zonë ku janë gjetur dhe këto pako. Pas përfundimit të aktiviteteve ajrore dhe bregdetare, forcat nga Katania filluan kontrollin e pakove. Pas analizës u konfirmua se bëhet fjalë për kokainë,” theksuan nga policia italiane.
