Në ditën e 100-të, oferta e fundit e Lëvizjes Vetëvendosje për LDK-në

Sot në ditën e 100-të pasi qytetarët janë përcaktuar për partinë që do ti qeverisë, dhe dy partitë fituese nuk kanë një Marrëveshje qeverisëse, mësohet se mbrëmë vonë, Kryetari i Lëvizjes Vetëvendosje, Albin Kurti i ka dërguar ofertën e fundit, kryetarit të LDK-së, Isa Musatafa.

Në këtë ofertë e cila sot u publikua në mediat kosovare, Kurti ka propozuar rritjen e numrit të ministrive nga 12 në 14. Kësisoj, LDK do të ketë gjashtë ministri, Vetëvendosje, pesë, derisa minoritetet tri ministri.

Oferta nga Kurti tek Mustafa ka shkuar të hënën rreth orës 22:00.

Në këtë ofertë janë detajuar të gjitha postet që do të mbante secili subjekt.

“Kryeministri, kryetari i Kuvendit, zv.kryeministri i 2-të, një nën-kryetar Kuvendi, 5 ministri do t’i takonin VV-së”, thuhet në propozim.

Vetëvendosje në këtë propozim ka ofruar që LDK të ketë zv,kryeministrin e parë, nënkryetarin e parë të Parlamentit, 6 ministri, dy zv.ministra më shumë se Lëvizja Vetëvendosje.

Po ashtu Vetëvendosje është pajtuar që LDK ta propozojë kandidatin për President i cili sipas Vetëvendosje plotëson të gjitha kushtet dhe te gjitha kriteret kushtetuese.

“Nëse, për çfarëdo arsye nuk zgjedhet Presidenti, atëherë LDK do ta marrë një ministri shtesë”, thuhet në propozim.

Ndryshe, që nga e enjtja e javës së kaluar LDK dhe Vetëvendosje nuk kanë zhvilluar takim për Marrëveshjen e kaolicionit qeverisës. Ndërsa dje pas vizitës së Ambasadorit amerikan Philip Kosnett në selinë e LDK-së, ku ai i bëri thirrje të dy partive që ta formojnë sa më shpejt qeverinë, kryetari i LDK-së, Isa Mustafa tha se zgjidhjen e ka Vetëvendosje.