Në Forumin Ekonomik në Davos, Kurti: Kosova është histori suksesi!
Duke folur në Forumin Ekonomik Botëror në Davos rreth zhvillimeve në Kosovë, Kryeministri Albin Kurti tha se Kosova është një histori suksesi.
“I nderuar për të dhënë fjalët hyrëse në Forumin Ekonomik Botërore rreth Kosovës si një histori suksesi, në një panel mbi financat ndërkombëtare të moderuar nga Sara Pantuliano, krahas David Cameron, Fettah Nadia, Songwe Vera, të gjithë të cilët ndajnë entuziazmin tonë për përparimin e Kosovë,” thekson Kryeministri i Kosovës, Albin Kurti, përmes rrjetit social X mbi fjalën e tij për financat ndërkombëtare.
Ndryshe, Kryeministri i Kosovës, Albin Kurti, gjatë Forumit Ekonomik Botëror në Davos, ka zhvilluar takime me personalitete të ndryshme botërore ku veçohet ai me Nd/Sekretarin amerikan të Shtetit për Evropën dhe Euroazinë, James O’Brien, takim në të cilin u diskutua për aktualitetin në Kosovë e rajon.
“SHBA është një mik dhe aleat i çmuar. Ne presim bashkëpunim të vazhdueshëm,” u shpreh Albin Kurti me përfundimin e takimit.
Në fillim të punimeve në Davos, Kryeministri Albin Kurti theksoi se prioritet i takimeve dypalëshe do të jetë siguria e Kosovës dhe mos shkelja e marrëveshjeve nga ana e Serbisë.
