Në Grupin e PD vazhdon përplasja, deputetët e Lulzim Bashës nuk duan qetësi!

Me fillimin e procesit zgjedhor nga Komisioni i Rithemelimit një lumë akuzash dhe urrejtje ndaj këtij procesi u hodhën nga “demokratët” që i bënin eko çdo Dege të PD, por nuk ishte e qartë se cili ishte burimi i gjithë kësaj përplasje që nuk është shfaqur nga këta “demokratë” as ndaj PPSH-së kriminale.

Por sot në Grupin Parlamentar të PD nën kryesimin e Enkelejd Alibeaj gjithçka u qartësua! Burim i gjithë kësaj maskarade janë pikërisht deputetët e Lulzim Bashës dhe Kunatit në këtë Grup të ndihmuar nga mediat në shërbim të Edi Ramës që transmetojnë në kohë reale debatin që po zhvillohej brenda Grupit.

Ndonëse çështjet kryesore për të cilat sot dhe kurrë nuk do të bijnë dakord deputetët e Bashës dhe ata të Partisë Demokratike janë dhe ngelën edhe pas përfundimit të mbledhjes, përjashtimi i 5 deputetëve nga Lulzim Basha dhe negociatat me Edi Ramën për Presidentin.

Pas mbledhjes së Grupit Parlamentar, lideri historik i PD, Sali Berisha, akuzoi Enkelejd Alibeajn dhe praktikën mafioze për procesin e zgjedhjes së Presidentit që ndjek Edi Rama.

“Në mbledhje të grupit theksova se opozita s’mund të përfaqësohet kurrë me të emëruar nga Taulant Balla. Kjo praktikë merr fund dhe nuk do ta njohë kurrë PD një praktikë të tillë. Së dyti, denoncova me forcën më të madhe praktikën mafioze që ndjek Edi Rama për procesin e zgjedhjes së Presidentit.

Praktikë kjo që diskrediton institucioni ne Presidencës dhe vetë zgjedhjen e Presidentit. Praktikë që përlyen qartësisht me aspektet e saj mafioze çdo lloj pjesëmarrjeje një proces që në kushte normale do merrnin pjesë të gjitha palët. Praktikë që nuk ka asnjë qëllim tjetër vetëm të nxjerrë nga zyrat e tij njeriun që zgjedh dhe që komandon,” tha Berisha duke sqaruar se cili do të jetë dhe fati i Enkeljed Alibeajt

“Do të mblidhet Kongresi do të zgjedhë këshillin Kombëtar dhe do të zgjidhet kryetari, unë nuk e njoh Alibeajn Unë nuk mund të pranoj vendime të paqena. Ata kanë bërë zgjidhjet e tyre, unë denoncoj farsën e shëmtuar të zgjedhjes së presidentit të Republikës, kur ajo zhvillohet me zarfe sekrete brenda grupit parlamentar, imagjinoi se si do të jetë me opozitën. Përcaktohen rregullat që duhet të kenë ligjin e parë të transparencës. Thirret shoqëria civile i thuhet mos shqipto emra, por dërgo email  pra këtu dëshmohet se kemi të bëjmë me një narkoshtet dhe opozita nuk mund të legjitimojë një proces të tillë.”

Për Kryetarin e Grupit Parlamentar të PD, Enkelejd Alibeaj, është Berisha ai cili me praninë e tij shkakton gjithmonë zhurmë ndërsa sqaroi dhe qëndrimin për zgjedhjen e Presidentit të Republikës.

“Kjo çështje është sqaruar në disa mbledhje, nuk besoj se është kjo çështja e rendit të ditës. Ishte një mbledhje që duhet të ishte zhvilluar dje. Sot në mbledhjen e grupit e para çështje ishte ajo e axhendës parlamentare. Një çështje tjetër ishte ajo e qëndrimit që duhet të mbajë PD në lidhje me procesin e përzgjedhjes së Presidentit. Propozimi im, që në mënyrë kolegjiale të konsultohen të gjithë deputetët për qëndrimin e grupit parlamentar. U la një mbledhje tjetër për t’u marrë mendimi i secilit deputet dhe në fund të sintetizohet qëndrimi i grupit parlamentar.

Në mbledhjet e Grupit Parlamentar ka gjithmonë zhurmë se gjithmonë ndodh që vjen z. Berisha dhe pa asnjë lloj roli jep opinionin e tij. Unë mund t’ju them për qëndrimin tim. Procesi i zgjedhjes së Presidentit të Republikës është një proces i rëndësishëm. Zgjedhja e Presidentit degradon fatkeqësisht në raundin e 4 dhe 5 me 71 vota dhe ju e kuptoni se sa penalizuese është për opozitën.

Megjithatë edhe sot që flasim, opinioni im është i qartë, Edi Rama nuk e ka të drejtën të zgjedhë presidentin e Republikës, nuk e ka të drejtën as me shumicën e thjeshtë. 4 deputetë të vetë sot nuk përfaqësojnë më zërin e qytetarëve, 2 janë pas qelisë, 2 të tjerë janë dezinjuar si non-grata nga SHBA,” tha Enkelejd Alibeaj duke përfunduar

“Presidenti është i shqiptarëve dhe ne kemi detyrimin që të bëhemi zëdhënës të shqiptarëve. E di mirë që Rama mendon që raundin e katërt në fund ta zgjedhë me votat e veta. Për këtë arsye Grupi Parlamentar i PD do të ketë kohë të mblidhet dhe të diskutojë për të dhënë qëndrimin e duhur të opozitës . Po jua them që sot jeni të ftuar në mbledhjen tjetër, pra e përsëris që presidenti duhet të jetë i shqiptarëve jo i politikës. Nuk rrudhet presidenti duke u futur në zarfe, ka dy rrugë, njëra është me bishtin ndër shalë dhe të shmangemi. Jo kjo nuk ndodh. Jo duke i ikur Edi Ramës, por duke ia grisur fasadën.”

Ndryshe, në fillim të mbledhjes së Grupit Parlamentar të PD, deputetja Albana Vokshi ka kërkuar nga Kryetari i Grupit Parlamentar të Partisë Demokratike, Enkelejd Alibeaj që të bëjë kërkesë në Kuvend për 5 deputetët e përjashtuar, për t’u cilësuar si deputetë të Grupit të PD por kjo u refuzua nga i dërguari i Lulzim Bashës në Grupin Parlamentar:

“Nuk zhbëj dot me vullnet personal vendime që janë marrë nga organet e partisë”.

Pesë deputetët e përjashtuar nga Grupi Parlmaentar i PD me vendim të Lulzim Bashës janë: Sali Berisha, Flamur Noka, Albana Vokshi dhe Luan Baçi.