Në Iowa, Presidentja e Kosovës: Serbia dëshiron të nxisë luftë!
Sulmi terrorist më 24 shtator në Banjskë të Zveçanit ishte akt i agresionit të Serbisë ndaj Kosovës, që kishte synim aneksimin e veriut, tha Presidentja e Kosovës, Vjosa Osmani në Iowa të Shteteve të Bashkuara duke konfirmuar se Kosova është rezultati dhe historia më e madhe e suksesit të politikës së jashtme amerikane.
Në një ligjëratë para studentëve të Universitetit Drake, Presidentja e Kosovës akuzoi Serbinë se dëshiron të nxisë luftë në rajon.
“Ajo që ndodhi më 24 shtator ishte kulmi i një akti të rëndë agresioni që Serbia po i bënte popullit të Kosovës brenda territorit tonë dhe atë ditë ishin një numër i grupeve terroriste që hynë në Kosovë me numër të madh armësh, armë të shkallës ushtarake me të cilat planifikonin të aneksonin veriun e Kosovës.
Policia jonë ka vepruar me shumë profesionalizëm dhe ka penguar aktin e agresionit që në minutat e para të tij. Por, nëse ne nuk do të ishim aq efektivë në fillim, padyshim që ata do të kishin qenë efektiv në afrimin gjithnjë e më shumë brenda veriut të Kosovës dhe aneksimin e pjesëve të territorit tonë.
Sigurisht që atëherë do të detyroheshim të përgjigjeshim dhe kjo do të destabilizonte jo vetëm Kosovën, por pjesën tjetër të rajonit,” tha Presidentja e Kosovës duke folur dhe për momentet kritike të mëngjesit të 24 shtatorit.
Angazhimi më i madh i trupave të NATO-s në Kosovë do të bëjë që mos të lejohen të hyjnë njerëz të armatosur në territorin e vendit, vlerëson Presidentja Vjosa Osmani duke konstatuar se Kosova është rezultat dhe historia më e madhe e suksesit të politikës së jashtme amerikane.
Gjatë qëndrimit në Iowa të SHBA-së, Osmani u prit ne takim edhe nga kryetari i qytetit Norwalk, Tom Philips, nga i cili u nderua me Çelësin e Qytetit dhe Yllin e Norwalkit.
“Përkushtimi i shtetit të Iowas për edukimin dhe fuqizimin e rinisë së Kosovës është i jashtëzakonshëm. Jashtëzakonisht mirënjohës për mbështetjen tuaj ndaj Republikës së Kosovës dhe rinisë sonë,” u shprehë Vjosa Osmani.
Presidentja e Kosovës, Vjosa Osmani ka zhvilluar një takim dhe me diasporën shqiptare në Iowa ku i falënderoi për mbështetjen ndaj atdheut.
