Në Jarinje lëvizja pa problem, Policia: Bërnjaku dhe Merdare mbesin të mbyllura!
Qarkullimi i automjeteve nga të dyja anët e kufirit verior në pikëkalimin Jarinje mes Kosovës dhe Serbisë sot është duke u zhvilluar pa ndonjë problem, një ditë pasi u bllokua pjesërisht nga disa shoqata serbe, ipas Policisë së Kosovës.
Ndërkohë, dy pikëkalime të tjera, Bërnjak dhe Merdare, vazhdojnë të mbesin të mbyllura.
Përfaqësues nga disa shoqata serbe i bllokuan të premten rrugët pranë tre pikave kufitare me Kosovën në territorin e Serbisë, Jarinje, Bërnjak dhe Merdare, duke mos i lejuar të kalonin udhëtarët me dokumente të Kosovës.
Por, zëvendësdrejtori i Policisë së Kosovës për rajonin e veriut, Veton Elshani, tha sot në mëngjes se në Jarinje nuk ka bllokim të kufirit.
“Në mëngjesin e sotëm në pikën kufitare në Jarinje, është duke u zhvilluar pa problem qarkullimi i automjeteve në të dyja anët e kufirit edhe të automjeteve me targa serbe dhe atyre me targa të Kosovës”, tha Elshani.
Megjithatë, në faqen zyrtare të Ministrisë së Brendshme të Kosovës qarkullimi në Jarinje thuhet se është i bllokuar për automjetet dhe kamionët me dokumente kosovare.
Autoritetet kosovare i mbyllën të premten në mbrëmje për qarkullim dy pikëkalime kufitare me Serbinë – Bërnjak dhe Merdare.
Ministri i Brendshëm i Kosovës, Xhelal Sveçla, tha të premten se këto dy pikëkalime janë mbyllur për pasi persona të maskuar në pjesën serbe të kufirit po i “ndalojnë në mënyrë selektive e me qasje fashiste” qytetarët që duan të kalojnë transit përmes Serbisë.
Gazetarët e RFE kanë parë persona të maskuar afër bllokimit të rrugës të vendosur në pjesën serbe të kufirit në Bërnjak natën e së premtes.
Shoqatat serbe i vendosën këtu bllokime në anën serbe të kufirit me Kosovën si shenjë proteste ndaj mbylljes së institucioneve paralele serbe në veri të Kosovës nga autoritetet kosovare.
Organizatorët e bllokimeve të rrugës duan që Kosova ta tërheqë policinë nga komunat me shumicë serbë në veri, ta lejojë përdorimin e valutës së dinarit serb, i cili u ndalua në fillim të këtij viti, si dhe ta lejojë punën e komunave paralele serbe./RFE/
