Në Këshillin e Sigurisë, Vuçiç: Amerika po armatos Shqipërinë, Kosovën… vetëm Serbinë jo!
Pas mbledhjes së Këshillit të Sigurisë, Presidenti i Serbisë, Aleksandar Vuçiç, bëri të ditur se u shqyrtuan situata në Kosovë, mbajtja e “Europride 2022” dhe kriza energjetike.
Duke rikujtuar se mbrëmë kishte një takim për rreth dy orë me të dërguarin special të Bashkimit Evropian për dialogun Kosovë-Serbi, Mirosllav Lajçak, dhe këshilltarët për politikë të jashtme dhe siguri të Francës dhe Gjermanisë, Emmanuel Beaune dhe Jenns Plettner, sot bëri të ditur se kishte marrë dhe propozimin e ri.
“Kemi marrë nga ata një propozim plotësisht me armaturë të re për negociatat në Bruksel, dhe i cili duhet të sjellë një zgjidhje të shpejtë përfundimtare, siç thonë ata, problemin me të cilin jemi përballur me të gjitha çështjet e pazgjidhura në lidhje me Kosovën,” tha Vuçiç duke cituar diplomatët evropianë të cilët vlerësojnë se në kushtet kur ka një luftë në Evropë, nuk duhetn konflikte të reja dhe për këtë arsye duhet zgjidhje e shpejtë, e fuqitë e mëdha perëndimore dhe Turqia kërkojnë zgjidhjen e problemit në Kosovë.
“Kështu ata do ta kenë më të lehtë që ti ofrojnë përgjigje Vladimir Putinit, sa i përket aspektit të precedentit ligjor dhe dhënies së pavarësisë së Kosovës,” tha Vuçiç, duke vazhduar me gjuhën e kriminelit serb, siç edhe është, duke shtuar se Serbia është bërë dëmi kolateral i konfliktit të fuqive të mëdha dhe sjelljes së tyre joparimore në të kaluarën.
Dhe jo vetëm kaq! Vuçiç shtoi se i kanë thënë që Putini ka ngritur perden dhe tani të gjithë duhet të deklarohen se në cilën anë të perdes do jenë.
Pavarësisht se po fliste në Këshillin e Sigurisë së Serbisë, në një rreth shumë të ngushtë zyrtarësh të lartë serbë, Vuçiç përdori retorikën kriminale si në një fushatë zgjedhore nëpër katunet pa serbë ku merr me vete shpurrën e vrasëtarëve që përmbytën tokën e Kosovës me gjak dhe sot vazhdojnë e kërcënojnë:
“Egërsia dhe banditizmi i pushtetit prishtinas nuk ka fund dhe sipas Nenit 9 të marrëveshjes së Brukselit, Policia e Kosovës në veri i takon drejtorisë Veri, ku 99 për qind e pjesëtarëve duhet të jenë serbë. Në të gjitha këto aksione nuk i informojnë serbët, nuk informojnë katër kryetarët e komunave, dhe deklarojnë se kontrollojnë Gazivodën, edhe pse ndodhet në territorin e njërës prej katër komunave serbe. Nuk ka normë ligjore që nuk kanë shkelur dhe përfaqësuesit e huaj këtë e dinë,” tha Presidenti i Serbisë, Aleksandar Vuçiç duke mos thënë asnjë fjalë të vërtetë nga i gjithë ky ligjërim, nga egërsia deri tek përfaqësuesit e huaj!
Në thelb, tha Vuçiç, shtetet perëndimore presin nga Serbia që të pranoj të gjitha që ata mendojnë se janë realiteti në Kosovë, por Serbia do të vazhdoj të bisedoj sepse kurrë nuk i ka refuzuar bisedimet.
Dhe, për ti qëndruar besnik përpjekjeve serbe për paqe në rajon përmes “Ballkanit të Hapur” dhe Edi Ramës, përveç BE sulmoi dhe Shtetet e Bashkuara:
“Amerika për mbrojtje nga agresioni rus do të dërgoj ndihmë në armatim për Shqipërinë, Maqedoninë e Veriut, Kosovë… dhe në listë nuk është vetëm një shtet, ai është Serbia.”
Pse nuk po arrihet marrëveshja me targat mes Kosovës dhe Serbisë janë vënë shumë pikëpyetje, por të gjitha i qartësoi sot burimi i këtij problemi, Aleksandar Vuçiç. Ai nuk e fshehu gëzimin pse qytetarët serbë të Kosovës nuk i janë përgjigjur thirrjes së Kryeministrit Albin Kurti për ti regjistruar makinat me targat e Kosovës por kanë vendosur të lëvizin me targa ilegale serbe.
“Informacion i rëndësishëm është se deri më sot 10 Shtator, ora 8:00 e mëngjesit, janë paraqitur vetëm dy persona për ndryshimin e targave, një nga veriu i Kosovës, tjetri nga jugu. Personi nga veriu është nga Leposaviçi dhe është pjesëtar i institucioneve të Kosovës. Nuk kanë mbështetjen e popullit dhe asnjërin që do të ndryshoj targat, në 10 ditë nuk arritën të gjejnë njeri me gjithë propagandën dhe të pavrtetat që thanë. Me këtë është e qartë se populli serb dëshiron dhe ky ishte mesazhi im edhe sot, populli serb dëshiron respektimin e të drejtës ndërkombëtare,” tha Presidenti i Serbisë duke zbuluar se kush është problemi në negociatat e Brukselit madje nuk hezitoi të kërcënoi ndërkombëtarët me fjalimin që do të mbajë pas pak ditësh në Asamblenë e Përgjithshme të Kombeve të Bashkuara në New York.
Ndryshe, në takimin e Këshillit të Sigurisë përveç Vuçiçit morën pjesë Kryeministrja Ana Bërnabiç, ministri i Financave, Sinisha Mali, shefi i shërbimit skeret serb BIA, Bratislav Gashiç, ministri i Mbrojtjes, Nebojsha Stefanoviç, shefi i Shtabit të Përgjithshëm të Ushtrisë së Serbisë, gjeneral Milan Mojsiloviç dhe Drejtori i Zyrës për Kosovën pranë Qeverisë së Kosovës, Petar Petkoviç.
