Në Klinikën Infektive në Prishtinë, 13 pacientë me koronavirus

Nga 20 personat e prekur me koronavirus në Kosovë, në Klinikën Infektive të Qendrës Klinike Universitare aktualisht janë të shtrirë 13 persona.

Infektologu Valbon Krasniqi tha se të gjithë pacientët janë në gjendje stabile, porse mbeten nën mbikëqyrje mjekësore.

Qytetarët që dyshojnë se janë të prekur me koronavirus, tha ai, në vazhdimësi po i frekuentojnë institucionet shëndetësore për t’i kryer testet laboratorike.

“Sa i përket testimit, nuk mund të jap ndonjë numër të saktë se sa njerëz gjatë ditës po testohen, meqë frekuenca e tyre është e madhe. Por, të gjitha testet kryhen në Institutin Kombëtar të Shëndetit Publik gjatë ditës, përpos atyre që vijnë pasdite, e që analizat u dalin të nesërmen në mëngjes”, tha Krasniqi.

Rastet e para me koronavirus në Kosovë janë konfirmuar më 13 mars.

Aktualisht janë 20 persona të infektuar.

Qeveria e Kosovës ka ndërmarrë disa masa për luftimin e sëmundjes, përfshirë shpalljen e gjendjes emergjente për shëndetin publik.

Në Kosovë kthehen 39 qytetarë, të gjithë në karantinë

Autoritetet kanë kthyer të enjten në Kosovë 39 qytetarë, të cilët kanë mbetur të bllokuar jashtë vendit, për shkak të situatës së krijuar me koronavirus. Një ditë më herët, ndërkaq, është kthyer ekipi kombëtar i boksit.

Ministri i Infrastrukturës dhe Mjedisit në Qeverinë e Kosovës, Lumir Abdixhiku, tha përmes një postimi në Facebook se të gjithë ata do të vendosen në karantinë 14-ditore në Qendrën Studentore në Prishtinë.

“Kthimi i qytetarëve të evidentuar nga ambasadat tona jashtë, në mënyrë të kujdesshme, të organizuar e pa rrezik për qytetarët këtu, do të vazhdojë’, tha Abdixhiku.

Kosova, tash për tash, ka 20 raste të konfirmuara me koronavirus.

Qeveria e Kosovës ka shpallur gjendje emergjente për shëndetin publik.

Për të penguar përhapjen e koronavirusit, shumë vende në botë i kanë mbyllur kufijtë./RFE/