Në KLP, kreu i SPAK: Sa kemi filluar të ecim! Policët bashkëpunojnë me krimin e organizuar…

Duke prezantuar raportin e punës së SPAK për vitin 2023 para Këshillit të Lartë të Prokurorisë, KLP, kreu i Prokurorisë së Posaçme, Altin Dumani, tha se SPAK tregoi se është në gjendje të hetojë cilindo subjekt ndërsa e pranoi se problematike mbetet ende përfshirja e policëve në krimin e organizuar, që pengojnë dhe punën për bashkëpunimin me policinë.

Gjatë vitit të shkuar, tha Dumani, janë regjistruar 221 procedime penale për korrupsion, 67 procedime janë nisur kryesisht nga SPAK, ndërsa vlera e pasurive konfiskuara e sekuestruara mbërrin një vlerë prej 41 mln euro, nga të cilat 54 % të sekuestruara, pjesa tjetër të konfiskuara.

SPAK-un, kreu i Prokurorisë së Posaçme e krahasoi me një fëmijë që sa ka nisur të ecë ndërsa kërkoi që t’i jepet më shumë kohë për SPAK për të arritur atë që ishte qëllimi i krijimit të saj, dhënies fund e pandëshkueshmërisë.

“Po, SPAK është në gjendje të kryejë hetime, të ushtrojë ndjekje penale karshi çdo subjekti pavarësisht cilësive të tij. Kjo është faza në të cilën gjendet SPAK, ne sa kemi filluar të ecim, si një fëmijë i vogël që sa nis të ecë. Duhet akoma kohë që të ecim me shpejtësi, po kërkon kohën e vet, rëndësi ka që po ecim. A jam i kënaqur?

Jam pjesërisht i kënaqur se jam shumë kërkues ndaj vetes dhe kolegëve por vlerësoj se kemi mundësi të bëjmë më mirë, por kemi dhënë shenja që ne jemi të aftë të përballemi me çdo lloj subjekti pavarësisht emrit, pavarësisht pozitës së tij publike, financiare. Shpresojmë që me kalimin e viteve të arrijmë qëllimin për të cilin u krijua struktura e posaçme, dhënia fund e pandëshkueshmërisë; ne po punojmë që ta shkurtojmë këtë kohë”, tha Dumani ndërsa foli për tetë procedime penale me 18 të pandehur për zyrtarë të nivelit të lartë, përfshirë ish-ministra, ish-kryeministra, ish-kryebashkiakë, apo ish-sekretarë të përgjithshëm.

“Gjatë vitit 2023, janë ngritur 10 skuadra të reja të përbashkëta, ndërsa hetimet vijojnë me 25 skuadra të përbashkëta hetimore. Ka një rritje me 95% të kërkesave për ndihmë juridike me jashtë shtetit, kryesisht me Italinë, Franca, vendet nordike si dhe me vendet e rajonit si Maqedonia e Veriut apo Kosova.”

Por, kreu i SPAK-ut foli dhe për një sërë problematikash që kanë të bëjnë me mbarëvajtjen e hetimeve, ndërsa theksoi pengesat që i bëhen Prokurorisë nga ana e institucioneve shtetërore.

“Krijimi i një nukli të oficerëve të policisë gjyqësore në policinë e shtetit ku mund të adresojmë procedimet tona mund të bëhet por ne bashkëpunojmë me strukturë të posaçme me drejtorinë e policisë së shtetit. Por janë një kategori çështjesh që ne nuk mund ti hetojmë me policinë e shtetit, sidomos ata kur përfshihen punonjësit e policisë së shtetit,” tha Altin Dumani duke vijuar rreth kësaj problematike:

“Hetimet tona kanë treguar që eksponentë të policisë së shtetit, madje me funksione të larta kanë bashkëpunuar me krimin e organizuar, referuar dhe çështjeve që kemi hetuar, dhe çështjeve që kemi në hetim e sipër. Janë një kategori çështjesh që ne hetojmë ekskluzivisht me BKH-në. Patjetër që bashkëpunojmë me policinë dhe kemi bashkëpunim të ngushtë.” 

Kreu i SPAK foli dhe për rënie të referimeve si në nivel qendror apo lokal dhe kjo vlerësohet si shumë shqetësuese për SPAK. Ai tha se kjo strukturë hetimi antikorrupsion e vetme nuk mund të përballojë luftën kundër kësaj gangrene dhe i ftoi titullarët e autoriteteve shtetërore të referojnë rastet duke ofruar një bashkëpunim të ngushtë me ta.

“Përjashtuar policinë e shtetit, institucione të tjera që edhe ata pjesë të detyrave e kompetencave të tyre kanë dhe luftën kundër korrupsionit, qoftë të nivelit qëndror apo lokal nuk referojnë në SPAK veprat penale në natyrë korruptive apo vepra të tjera penale. Ky është shqetësim për SPAK, pasi SPAK i vetëm nuk mund të adresojë dhe përballojë luftën kundër korrupsionit apo vepra të tjera penale që kryhen nga subjekte që mbajnë një funksion shtetëror.

Është e nevojshme dhe domosdoshme forcimi i bashkëpunimit dhe rritja e numrit të referimeve nga institucionet e tjera. Ne si strukturë, BKH apo SPAK jemi shumë të hapur e shumë bashkëpunues me të. Cilido institucion e ka konstatuar këtë,” tha kreu i SPAK-ut, Altin Dumani, duke kërkuar që çdo institucion të kryen punën e vet ndërsa përfundoi:

“Në çështje të natyrës sensitive ne vëmë në dispozicion të gjithë mjetet teknike të rastit, por secili institucion duhet të bëjë detyrën e vet. Institucionet që kanë për detyrë edhe dhe luftën kundër korrupsionit duhet të jenë të vëmendshëm dhe të rrisin referimet për veprat penale si korrupsion, shkelje të barazisë në tendera.“