Në kufirin Kroaci-Mali i Zi, policia malazeze kap shqiptarin me 18 kg kokainë

Doganierët e Malit Zi në bashkëpunim me Drejtorinë e Përgjithshme të Policisë, mëngjesin e sotëm kanë zbuluar në vendkalimin kufitar Debeli Brijeg, 18 pako me pluhur të bardhë me dyshimin e bazuar se është kokainë.

Pasi kaloi kufirin e Kroacisë duke u futur në Mal të Zi, makina me targa franceze të cilën e drejtonte një shtetas shqiptar, u ndal për kontroll të detajuar pas procedurave të rregullta doganore dhe kontrollit të automjetit e udhëtarëve.

Pas kontrollit të detajuar të automjetit tip BMW nga ana e doganierëve dhe policisë kufitare, sasia më e madhe e drogës u gjetë në një bunker special i cili ishte vendosur poshtë sediles së shoferit dhe pasagjerit, raporton televizioni publik i Malit Zi, duke ju referuar organeve hetimore. 

Shtetasi i Shqipërisë u arrestua ndërsa droga iu dorëzua Shërbimit për luftën kundër keqpërdorimit të drogës pranë Drejtorisë së Përgjithshme të Policisë së Malit Zi.

Pakot janë të një madhësie, peshe dhe forme, të mbyllura me një shirit ngjitës.