Në Kushtetuese, Prokurorja e SPAK: E pandehura Belinda Balluku ka kryer krime të rënda disa herë!
Prokurorja e SPAK Dorina Bejko ka argumentuar në Gjykatën Kushtetuese arsyet pse Belinda Balluku, e marrë e pandehur nuk mund të qëndrojë në detyrë.
Në seancën publike të Gjykatës Kushtetuese ku shqyrtohet pezullimi i saj nga detyrë, prokuroria tha se e pandehura ka kryer vepër penale me natyrë të rëndë kriminale. Sipas prokurores se SPAK, pezullimin nga detyra të Belinda Ballukut e shohim të lidhur me pozicionin e saj si ministre.
“Në rastin konkret vepra penale që ne hetojmë konsiderohen krime të natyrës së rëndë, për shkak të rrezikshmërisë dhe subjekteve që kryejnë ato. Vepra penale që i është atribuuar të hetuarës përfshihet në konceptin e krimit të rëndë.
Jemi para situatës kur e hetuara ka kryer jo një, por disa fakte penale historike që përkthehen në veprën penale të parashikuar nga neni 258 të kodit penal disa herë,” sqaroi prokurorja e SPAK, Dorina Bejko.
“Pezullimin nga detyra e shohim të lidhur me pozicionin e saj si ministre.
Ne, SPAK ato dy lloje masa shtrënguese i ka kërkuar në përputhje me rrethanat që kanë ekzistuar në atë moment. Në atë moment SPAK ka konkluduar se nëse e hetuara do vazhdonte të ushtronte detyrën do kryente vepra penale të të njëjtit lloj,” tha Prokurorja e SPAK, Dorina Bejko.
Sot në Gjykatën Kushtetuese u zhvillua seanca në lidhje me masën e sigurisë të vendosur nga Gjykata për Korrupsionin dhe Krimin e Organizuar, GJKKO, ndaj Zv/Kryeministres Belinda Balluku, “pezullimi i ushtrimit të detyrës publike”. Pas arsyetimit të palëve, trupa gjykuese është tërheq dhe pritet publikimi i vendimit.
Ndryshe, kjo seancë mbahet pas ankimimit të Kryeministrit Edi Rama, i cili pretendon se me vendimin e pezullimit të Belinda Ballukut, gjykata ka shkelur kompetencat e tij si kryeministër.
Ndërkohë pas vendimit të Gjykatës Kushtetuese që ta pezulloj, pezullimin nga GJKKO, SPAK ka dorëzuar në Parlament kërkesën për autorizim për arrestimin e Belinda Ballukut, në kohën kur me vendim të Kushtetueses, Balluku u kthye në detyrë, ndërsa mbledhja e radhës e Këshillit të Mandateve është caktuar më datë 28 janar.
Belinda Balluku është marrë në cilësinë e të pandehurit në kuadër të procedimit penal nr.136 të vitit 2025, pasi akuzohet për kryerjen e veprës penale:
“Shkelja e barazisë së pjesëmarrësve në tendera apo ankande publike”, e kryer në bashkëpunim, e parashikuar nga nenet 258/2 dhe 25 të Kodit Penal, në lidhje me procedurën e prokurimit me objekt “Ndërtimi i tunelit të Llogarasë”.
Gjithashtu, Belinda Balluku ka marrë cilësinë e personit nën hetim për dyshimin e kryerjes së të njëjtës vepër penale për shtatë procedura të tjera prokurimi me objekt: “Plotësimi, rakordimi dhe vazhdimi i punimeve Sheshi Shqiponja-Lumi i Tiranës, Loti 1 dhe QMT”; “Ndërtimi i segmentit rrugor Sheshi Shqiponja-Bulevardi i Ri, Loti 2”; “Ndërtim i segmentit rrugor Sheshi Shqiponja-Bulevardi i Ri- Shkozë, Urat mbi lumin Tirana”; “Ndërtimi i Unazës së Jashtme Tiranë, Loti 4”; “Ndërtim i Unazës së Jashtme Tiranë, Loti 5”; “Ndërtim i Unazës së Jashtme Tiranë, Loti 6”; “Ndërtim i Unazës së Jashtme Tiranë, Loti 7”.
