Në listën e zezë të SHBA, Komisioni e largon nga shërbimi civil Nexhat Krasniqin

Komisioni disiplinor ka marrë vendim që ta largojë nga shërbimi civil Nexhat Krasniqin, i cili është përfshirë në listën e zezë të Departamentit amerikan të Shtetit, tha sot ministri i Infrastrukturës, Liburn Aliu.

“Më datën 3 nëntor jemi njoftuar nga Departamenti i Shtetit që z. Krasniqi ka masë. Sot me vendim të Komisionit Disiplinor ai është hequr nga shërbimi civil,” tha Liburn Aliu pas mbledhjes së Qeverisë duke konfirmuar se ky është një proces që ka shkuar sipas rregullave.

“Për deklarimin e ministres së Drejtësisë, e falënderoi atë që ka gjetur kohë të flasë për këtë çështje. Tash pas kësaj situate, po presim informata nga DASH-i dhe çfarëdo situate që shpie në diçka të dyshimtë, menjëherë do të kërkohet auditim.”

Ndryshe, Departamenti amerikan i Shtetit e kishte vendosur në listën e sanksioneve Nexhat Krasniqin, ish-drejtor i Departamentit të Prokurimit në Ministrinë e Tregtisë dhe Industrisë, për shkak të përfshirjes në korrupsion.

Nën sanksione janë vendosur edhe fëmijët e Nexhat Krasniqit, Aulona dhe Olti Krasniqi, të cilëve gjithashtu nuk do t’iu lejohet hyrja në SHBA.

Në vitin 2015, Nexhat Krasniqi u dënua me 26 muaj burgim për keqpërdorim të detyrës zyrtare në rastin e Parkut të Biznesit në Drenas.