Në Michigan, Trump: Ta bëjmë Amerikën të sigurt përsëri!

Ish-presidenti Donald Trump gjatë fushatës së tijë në Michigan premtoi “ta bëjmë Amerikën të sigurt përsëri”, ndërkohë që demokratët vazhdojnë Kuvendin e tyre në Chicago ku do shpallin zyrtarisht Zv/Presidenten Kamala Harris si kandidate për Presidente dhe ku shumë nga folësit kanë përmendur problemet e tij ligjore.

Duke bërë fushatë në një shtet me rëndësi vendimtare për rezultatin e zgjedhjeve, zoti Trump sulmoi Zv/Presidenten Harris, një ish-Prokurore të Përgjithshme të Kalifornisë, duke thënë se nëse fiton ajo do “të sjellë krim, kaos, shkatërrim dhe vdekje”.

“Do të shihni nivele krimi që nuk i keni parë kurrë më parë. … Unë do të vendos ligjin, rendin, sigurinë dhe paqen.”

Donald Trump është përpjekur në javët e fundit të zbehë entusiazmin që ka ngjallur zonja Harris, pasi Presidenti Joe Biden u tërhoq nga gara dhe e mbështeti atë si kandidate.

Tubimi i ish-Presidentit Trump ishte në vazhdën e disa aktiviteteve që kishin si objektiv paraqitjen e vizionit të tij për çështje të caktuara që shqetësojnë votuesit.

Por Doanld Trump i ka përdorur këto raste për të sulmuar personalisht zonjën Harris dhe duke goditur Presidentin Biden.

Në Michigan, ish-Presidenti paraqiti një tablo të zymtë të jetës në Shtetet e Bashkuara dhe foli për rrezikun e një presidence të zonjës Harris, megjithëse nuk dha shembuj konkretë.

“Është çmenduri. Nuk mund të dalësh në rrugë për të blerë bukë. Të godasin, të grabisin, të përdhunojnë … është koha për ndryshim.”

Imazhi i Donald Trump duke bërë pretendime të tilla, i rrethuar nga oficerë të zbatimit të ligjit që e mbështesin atë, ishte në kontrast të plotë me Kuvendin e demokratëve.

Folësit në këtë Kuvend, u kujtuan amerikanëve se Donald Trump është ish-Presidenti i parë i shpallur fajtor për krime të rënda, dhe ende përballet me akt-padi të shumta, përfshirë për përpjekjet e tij për të përmbysur rezultatin e zgjedhjeve të vitit 2020./VOA/