Në paketimin e produkteve të detit në Kinë, zbulohet koronavirusi

Kina ka bërë të ditur sot se ka gjetur koronavirus në paketimin e produkteve të ngrira të detit, të cilat po vinin nga porti Dalian, ku sërish shënohen raste të reja të infeksionit.

Virusi është gjetur në pjesën e jashtme të paketimit të ushqimit të ngrirë që ishin blerë nga një kompani nga Yantai, port ky në krahinën Shandong në lindje të Kinës.

Administrata e bashkisë Yantai ka bërë të ditur se produktet e detit që ishin dërguar në Dalian, ishin importuar por nuk zbuluan vendin e origjinës.

Në muajin korrik, doganierët në Dalian kanë zbuluar koronavirus në paketimin e karkalecëve të ngrirë që ishin importuar nga Ekuadori, dhe Kina kishte pezulluar importin e tri produkteve të prodhuesve ekuadorian të karkalecëve..

Një pjesë e produkteve të detit që kishin blerë kompanitë Yantai ishin përpunuar për tu eksportuar, e pjesa tjetër po ruhet në depo frigoriferike dhe nuk është lëshuar në treg, kanë bërë të ditur zyrtarët e bashkisë Yantai.