Në përvjetorin e Internacionales Komuniste, Ilir Meta organizon protestë!

Në luftën për mbrojtjen e Kushtetutës, Ilir Meta i bënë thirrje popullit që ta mbrojë vendin nga grusht shteti i Edi Ramës. Dhe për ta shpëtuar vendin nga ky diktator, protestën popullore e thirrë më 2 Mars. Dhe jo vetëm kaq! Protesta, thotë Ilir Meta, do të jetë “kuq e zi”!

Shumë simbolika për ti besuar rastësisë, aq më shumë kur është zgjedhur 2 Marsi, përvjetori i Internacionales Komuniste, kur  në mënyrë logjike kjo protestë mund të respektonte 15 Marsin, i caktuar si dita e përfundimit të Reformës Zgjedhore, dhe do të ishte një arsye më shumë kundër regjimit të Edi Ramës, pasi tashmë është e qartë që po shkon drejtë dështimit.

Nëse kësaj i shtojmë edhe faktin se Reforma Zgjedhore është zotim i LSI-së, shef i së cilës vazhdon të jetë vetë Ilir Meta, si dhe atyre që nuk janë të kuq, Partisë Demokratike, kryetari i së cilës është, Lulzim Basha, vendimi për ta mbështetur këtë protestë del i pakuptimtë meqë të djathtët shqiptarë nuk kanë lidhje me revolucionin dhe komunistët, dhe mund të jenë të zi vetëm në subkoshiencën e komunistëve.

Dishepulli i Leninit

Pse 2 Marsi?! Dhe, pse diktatura e Edi Ramës të zëvendësohet me “diktaturën e popullit”?!

Internacionalja Komuniste, shkurt Kominterni, është mbajtur më 2-6 Mars 1919, me iniciativën e Partisë Komuniste të Rusisë dhe liderit të saj Vladimir Iliç Lenin, me propagandën se këtu shënohet ndarja nga socializmi oportunist dhe reformist. Kongresin e hapi Lenini me referatin mbi demokracinë borgjeze dhe diktaturën e proletariatit dhe u bë një dokument programor i Kominternit. Lenini zbërtheu karakterin klasor të demokracisë borgjeze të cilin, me arsyen e “demokracisë së përgjithshme” e mbrojtën me vendosmëri jo vetëm partitë borgjeze, por edhe partitë e Internacionales së Dytë. Fjalimin e tij Lenini e mbylli me fjalët:

“Poshtë oportunizmi, rroftë Internacionalja e Tretë!”

E gjithë trajektorja e Presidentit të Republikës, Ilir Meta, të zgjedhur me votat e Partisë Socialiste me urdhër të Edi Ramës, deri në thirrjen për protesta më 2 Mars, artikulohet në oportunizmin e rilindjes sepse socialistët janë të mirë, dhe diktaturën e Edi Ramës e cila duhet të luftohet nga populli.

Pra, Meta ky dishepull i Leninit, sot na thotë  se oportunistët rilindas shkatërruan socialistët e mirë, kur dihet që këta “të mirë” erdhën nga Partia e Punës, parti kriminale e  cila mbahet në mend vetëm për keqtrajtime, internime dhe vrasje. Dhe deri sa Lenini bënte thirrje për diktaturën e proletariatit, Meta e konverton në diktaturën e popullit, një iditozëm që vetëm një komunist mund ta nxjerrë nga goja për të na thënë se Gjykatën Kushtetuese dhe institucionin e Presidentit mund ta mbrojë populli!  

Por marrëzia leniniste e Metës nuk përfundon këtu! Dihet që themelimi i Kominternit ishte ide e Leninit për ta ndihmuar shtetin sovjetik për të tejkaluar luftën civile ruse, dhe korri sukses duke mbledhur ato parti që pranuan teorinë revolucionare leniniste përballë asaj revizioniste nga Internacionalja e Dytë, e cila hoqi dorë nga lufta e armatosur duke u angazhuar për të drejtën e punëtorëve përmes sindikatave, lirisë së shtypit dhe zgjedhjeve të lira brenda institucioneve të demokracisë parlamentare. Përballë revizionistëve, që në shumicën e rasteve mbajtën emërtimin socialdemokrat, përfaqësuesit e rrymës revolucionare, bazuar në partinë ruse, miratuan emrin komunist, prej nga dhe rrjedhë emërtimi Internacionalja Komuniste.

Kështu po ndodhë edhe me Shqipërinë presidenti i së cilës është Ilir Meta! Në prag të shpërthimit të luftës civile, ku e ka katandisur Edi Rama, Meta shpik një bashkim të partive kundër pushtetit dhe oligarkëve të tij; Pushtet i cili natyrshëm nuk e do luftën sepse është majur aq shumë dhe i ka blerë që të gjitha, duke filluar nga mediat, sindikatat, KQZ dhe tashmë edhe të gjitha pushtetet, sa që trumbetojnë pa u ndalur për lirinë e mediave, zgjedhje të lira dhe të ndershme dhe demokraci parlamentare me në krye shokun Gramoz. 

“Kjo është lufta finale…”

Ilir Meta tha se protesta do të jetë popullore dhe kuq e zi! Kryetarja zyrtar e LSI, Monika Kryemadhi, e kuqe në shpirt dhe zemër ashtu si dhe partia e saj, e bëri të ditur nga Shkodra se jo si kryetare partie por si qytetare do ta mbështesë, jo burrin dhe presidentin, por Gjykatën Kushtetuese dhe Shqipërinë.

Ndonëse edhe pa deklarimin e saj ishte e qartë se kush janë të kuqtë që do të jenë e kësaj proteste, e paqartë është se si do të bëhet protesta kuq e zi.

Po, LSI është parti komuniste e cila braktisi socialistë në luftën për pushtet. Më pas braktisi koalicionin qeverisës me demokratët, me urdhër të Internacionales Socialiste dhe Presidentit të Serbisë, dhe solli në pushtet Edi Ramën me rilindjen e tij, poashtu të kuq.

Sot Ilir Meta gjen nuancën e socialistëve me Edi Ramën dhe rilindjen e tij, por në vitin 2013 kur Meta solli në pushtet Ramën, ishte po ky me po këta rilindas kriminel, me dallimin e vetëm, që, nuk ishin kaq të pasur sa janë sot. Dhe, sot nuk janë të interesuar për luftë, siç bënë në vitin 2011, ashtu siç nuk janë të interesuar për Ilir Metën i cili edhe sot e sheh në ëndërr rikthimin e tij në krye të Partisë Socialiste!

Po kush janë të zitë!

Ata që partia mëmë e Ilir Metës i keqtrajtoi, internoi dhe vrau, dhe për të cilat merita sot Presidenti Meta vazhdon dhe i dekoron, sot Meta i projekton në krah për ta rrëzuar atë që solli vetë në pushtet, Edi Ramën, nuk janë të kuq.

Ata nuk janë të kuq siç është vetë Ilir Meta dhe Edi Rama, me të kaluar kriminale si nga partia që vjenë ashtu dhe karriera politike nga FRESSHI deri në krye të shtetit.

Por, ata nuk janë as të zi, pavarësisht se si i trajton edhe sot Ilir Meta!

Ata janë me zemër të madhe, rrëzuan bustin e diktatorit por nuk ndëshkuan vrasësit, dhe Meta këtë fisnikëri e kupton si dobësi. Jo, jo, antikomunistët e duan atdheun dhe nuk janë për ta shkatërruar ndërsa atë që bëri Lenini, Ilir Meta mund ta bëjë në çdo sekondë dhe bazuar në veprimet politike shqiptare, vetëm komunistët mund të jenë të zi. Diktaturën duan ta rrëzojnë me diktaturë, madje së fundi, zëdhënësi i presidentit përmend dhe vdekjen.  

Artikulimi i Ilir Metës dhe historia e Internacionales Komuniste mjafton për ta lënë në punë të vetë, në protestën e vetë dhe qëllimin e vetë për ardhje në pushtet me diktaturë, qoftë kjo dhe popullore, pa e prit rrugën demokratike si mjetin e fundit që është menduar të realizohet pas 15 Marsit!

Për ata që e kanë projektuar fitoren me Ilir Metën në krah, këtë e bëri dhe Lenini. Por me ardhjen në pushtet, dhe vdekjen e tij, u bënë dy fraksione, trockist dhe stalinist, dhe nuk u bënë për nuanca ngjyrash, kuq ose zi, por për pushtet. Trockistët angazhoheshin për zgjerimin e mëtejmë të revolucionit ndërsa stalinistët e konsideronin më të rëndësishme mbrojtjen e Bashkimit Sovjetik me çdo çmim.

Se kush mund të  dal Stalini në këtë mes nuk duhet ndonjë shkencë, e kaluara e afërt na tregon se si u trajtuan ata që nuk ishin të kuq kur Ilir Meta ishte kryeministër, zv/kryeministër me 30 % të pushtetit, kryetar parlamenti dhe së fundit president.

Pse nuk do ta shpërbëj edhe Kominternin shqiptar ose siç e quan ai në mënyrë abuzive “Besëlidhjen”, duke harruar 2 Marsin 2020 për të mos prishur marrëdhëniet me perëndimorët; Siç bëri Stalini, dhe shkeli me dy këmbët Kominternin me spiunimet ndër vete, denoncimet, kritikat shoqërore ku nuk kanë munguar as prerjet e kokave!

Në fund, për të gjithë ata që nuk besojnë se historia mund të përsëritet dhe u besojnë përallave “kuq e zi” të dala nga goja komuniste. Mos u habisni, nëse më 2 Mars, të rinjtë e Monës do t’ia japin këngës “Kjo është lufta finale…” Gurmazi i tyre është trajtuar me jod të Jonit në Jalë, jo me gaz të Ish-Gjeneral Sandër Lleshajt në protestat para kryeministrisë dhe parlamentit. Nëse e pranoni përçmimin dhe mbajtjen e isos, askush nuk mund t’iu ndalë, por, për borxh ia keni vetes tuaj, familjes dhe atdheut, të reflektoni vetëm pak, shumë pak, në mënyrë që të pyesni veten: Pse në protestat e vitit të kaluar Mona me LSI nuk arritën të mbledhin më shumë se 100 pjesëmarrës në protestat e “Opozitës së Bashkuar”?! Nëse besoni se edhe kjo ishte rastësi, gjithçka tjetër është e parëndësishme. Zgjedhja është e juaja…