Në Pogradec, Basha: Nën qeverisjen e PD, Shqipëria nuk do të punojë për 5 veta!

Kryetari i Partisë Demokratike, Lulzim Basha, rikthehet në Pogradecin me një potencial të jashtëzakonshëm turizmi i cili sot po vuan nga kriza e madhe ekonomike që ka përfshirë vendin.

“Në çdo biznes që isha sot, më treguan se puna ka rënë me të paktën 50%. Punëtorët i kanë larguar pasi nuk kanë me se t’i paguajnë. Taksat vazhdojnë t’i shlyejnë sikur mos të ketë ndodhur asgjë, ndërsa këtë vit edhe pse në kushtet e COVID-19, Bashkia ka rritur taksat dhe tarifat,” tha Lulzim Basha pas takimit me biznesin e Pogradecit duke vlerësuar se Ramavirusi i braktisi njerëzit në ditët më të vështira, duke i lënë në mëshirë të fatit, siç po bën edhe tani me pandeminë.

“Të infektuarit po shtohen, sikundër dhe personat, që po humbasin jetën, ndërsa qeveria nuk ka asnjë strategji dhe asnjë plan masash për të mbrojtur qytetarët dhe ekonominë që po zhytet në krizë të vazhdueshme.”

Në takimin që zhvilloi në një fasoneri në Pogradec, sipërmarrësi i tregoi Kryetarit të Partisë Demokratike, për shqetësimet lidhur me kostot shtesë për shkak të nevojës së masave të marra për COVID-19, ndërsa qeveria nuk u ka dhënë asnjë mbështetje.

“Kjo papërgjegjshmëri dhe arrogancë e shtetit ndaj qytetarëve dhe bizneseve duhet dhe do të marrë fund. Plani ynë ekonomik ka në fokus të veçantë biznesin e vogël dhe klimën e të bërit biznes në përgjithësi,” tha Basha duke premtuar se Qeveria e PD do të vendos moratorium 1 vjeçar të inspektoriateve, deri kur të garantohen standartet europiane përmes një kuadri të ri ligjor bazuar mbi eksperiencat më të mira të Perëndimit.

“Taksa për biznesin e vogël do të jetë vetëm një: 0.5% e xhiros vjetore dhe të ardhurat do të shkojnë për pushtetin lokal, për të nxitur zhvillimin dhe rritjen e vëmendjes së shtetit në qytetet dhe fshatrat e Shqipërisë. Taksa për biznesin me të ardhura mbi 140 milionë lekë në vit, do të jetë taksa e sheshtë 9%, ndërkohë që do të heqim ‘taksën Rama’ për karburantin,” ishin premtimet e Kryetarit të Partisë Demokratike, Lulzim Basha, para sipërmarrësve të Pogradecit duke i konsideruar hapa të domosdoshëm për të stabilizuar ekonominë dhe nxitur zhvillimin ndërsa përfundoi:

“Shqipëria nën qeverisjen e Partisë Demokratike nuk do të punojë për 5 veta, por do të jetë Shqipëria e të gjithëve, që kujdeset dhe mbron interesat e gjithsecilit.”