Në prag të 25 Prillit/ Thirrje qytetarëve, Kim: Mos ia dorëzoni fuqinë tuaj kriminelëve!

Pas dështimit që përmes liderëve politik të parandaloj futjen e kriminelëve në listat e kandidatëve për deputetë, sot kur na ndajnë vetëm 26 ditë nga zgjedhjet parlamentare të 25 Prillit dhe vazhdon të shpresojë tek KQZ, Ambasadorja e SHBA në Tiranë, Yuri Kim, i ka bërë thirrje qytetarëve shqiptarë që të mos e shesin të drejtën e tyre dhe të mos e dorëzojnë fuqinëe tyre në duart e kriminelëve.

“Mos e shisni të drejtën tuaj. Mos ia dorëzoni fuqinë tuaj kriminelëve,” shprehet Ambasadorja amerikane Yuri Kim përmes rrjetit social Twitter duke përfunduar:

“Vetëm ti mund ta zgjedhësh të ardhmen tënde!”

Ndryshe, në fillim të muajit mars, Ambasadorja e SHBA në Tiranë, Yuri Kim, tha se janë tre emra që Sekretari i Shtetit i ka përcaktuar. “Nuk do t’ua zë emrat me gojë por mund t’i shihni vetë. Më lejoni të them për çështjen e listave, siç e thamë më herët, pikëpamja e SHBA është bërë e qartë në mënyrë jodiplomatike nga unë. Mendoj që partitë e kanë marrë atë parasysh, jo të gjitha, por shumica e tyre. Tani listat janë në KQZ dhe është detyra e tyre, së bashku me prokurororët që t’i kontrollojnë, t’i vetojnë ata kandidatë,” tha Ambasadorja Yuri Kim duke shtuar se nuk duhet të habitemi nëse nuk do ti shohim disa prej tyre në lista.

Derisa aktualisht vazhdon verifikimi i dhjetëra kandidatëve për deputetë, të gjithë ata që njohin Edi Ramën as nuk presin të habiten dhe as që e mendojnë Parlamentin pa kriminelë përderisa liderët janë të atij niveli.