Në prag të Samitit BE-Ballkan, Borrell takim me liderët e Ballkanit në New York

Përfaqësuesi i Lartë për Punë të Jashtme dhe Siguri pranë BE, Josep Borrell ka shtruar mbrëmë një darkë informale për udhëheqësit e Ballkanit Perëndimor në New York, pjesëmarrës në Asamblenë e Përgjithshme të Kombeve të Bashkuara.

“Përfaqësuesi i Lartë dhe udhëheqësit e Ballkanit Perëndimor patën një shkëmbim të hapur mbi situatën në rajon dhe marrëdhëniet BE-Ballkani Perëndimor, gjithashtu në dritën e Samitit të ardhshëm BE-Ballkan Perëndimor që do të mbahet në muajin e ardhshëm. Ai siguroi një mundësi për të diskutuar pritjet për anëtarësimin në BE. Përfaqësuesi i Lartë nënvizoi nevojën për një angazhim të fortë si nga partnerët e Ballkanit Perëndimor ashtu edhe nga Bashkimi Evropian dhe Shtetet Anëtare për të kapërcyer dinamikat aktuale dhe për të çuar procesin përpara,” thuhet në njoftimin e Bashkimit Europian.

Ndryshe, pjesëmarrës në këtë takim ishin Presidentja e Kosovës, Vjosa Osmani, i Malit të Zi Milo Gjukanoviç, i Maqedonisë së Veriut, Stevo Pendarovski, anëtari i Presidencës së Bosnje dhe Hercegovinës Zhelko Komshiq, kryeministri i Shqipërisë Edi Rama, dhe ministri i Jashtëm i Serbisë, Nikola Selakoviç.

Ky ishte takimi i dytë i organizuar nga Përfaqësuesi i Lartë për Punë të Jashtme dhe Siguri pranë BE, Josep Borrell, pas darkës joformale në Bruksel në muajin maj.