Në pritje të raportit për tre policët, Kurti: S’kam vendosur për takim me Borrellin!
Kryeministri Albin Kurti sqaroi se fillimisht do të presë vizitën e Ambasadorit të Kosovës në Serbi, Jetish Jasharit, në burgun e Kralevës, ku po mbahen tre policët e rrëmbyer të Kosovës në afërsi të kufirit në veri nga Policia e Serbisë.
Bazuar në atë raport, do të vendos nëse do të shkojë në takimin e thirrur nga Borrell në Bruksel apo jo, tha Kryeministri Kurti, pasi mori pjesë në Akademinë solemne me rastin e 70-vjetorit të themelimit të Institutit Albanologjik..
Me këtë rast, Kryeministri Albin Kurti, sqaroi se ishte ai që ka kërkuar javën e kaluar takimin me Përfaqësuesin e Lartë për Politikë të Jashtme e Siguri i BE, Josep Borrell.
“Por, mu tha se duhet të shtensionohet situata. E më pas kishim arrestimin e tre policëve tanë në Leposaviç. Pra eskalimi u shtua,” tha Kurti duke shtuar se vetëm pas këtyre ngjarjeve, është ftuar për një takim të radhës në Bruksel.
“E që nuk jam i sigurt nëse është menduar për datën 22 apo 23 qershor për shkak të mesazheve të ndryshme!”
Sidoqoftë, ai sqaroi se fillimisht do që të presë vizitën e Ambasadorit të Kosovës në Serbi, Jetish Jasharit, në burgun e Kralevës, ku po mbahen tre policët e Kosovës të rrëmbyer nga Policia e Serbisë.
“Kur t’i kem të dhënat nga kjo vizitë e tre policëve tanë që po mbahen peng, po mbahen rob në Serbi si hakmarrje për luftimin e krimit dhe korrupsionit në Kosovë, do ta marrë vendimin dhe do ta jap njoftimin,” tha kryeministri Kurti.
Për aq sa ka informacione, tha ai, vizita e Ambasadorit të Kosovës në Beograd, Jetish Jashari, në burgun e Kralevës, është caktuar për ditën e martë.
”Unë do të jem në kontakt me ambasadorin tonë që të më njoftojë për gjendjen e policëve tanë.”
Sa i përket situatës në veri, ai tha se për shkak se atje ka grupe kriminale, ka ofruar që Republika e Kosovës, gradualisht ta zvogëlojë numrin e policëve atje, por me sundimin e ligjit, që të përballen me drejtësinë ata kriminelë që sulmuan edhe ushtarët e KFOR-it, Policët e Kosovës dhe gazetarët.
“Këtë e kemi propozuar ne, kurse për Policinë e Kosovës, çdo komunë e republikës sonë është e njëjtë dhe veprimet e funksionimi operativ bëhet vetëm duke u bazuar në Kushtetutshmëri dhe ligjin në fuqi e procedurat e tyre të brendshme.”
