Në qendër të Tiranës/ Deputeti i PS nuk keqtrajton turistë spanjoll, ama ndërton pa leje
IKMT u tregua shumë efikase në ruajtjen e territorit në rastin e Mihal Kokëdhimës, duke u arsyetuar se nuk kishte të bënte me rastin e turistëve spanjoll por me misionin që ka Inspektorati Kombëtar i Mbrojtjes së Territorit.
Një socialist i çmendur edhe mund ta ketë besuar këtë qëndrim zyrtar duke mohuar ndikimin e Edi Ramës në fadromat e IKMT-së, por rasti i fundit me deputetin e LSI-së të konvertuar në socialist, Robert Bitri, me ndërtimin pa leje në qendër të Tiranës, vë në dyshim jo vetëm misionin e Inspektoratit Kombëtar të Mbrojtjes së Territorit.
Banorët e njësisë Nr.1 në kryeqytet kanë denoncuar deputetin socialist, Robert Bitri për shtesën e një ndërtese në rrugën Asllan Visha, duke konfirmuar se ajo është pa leje.
Pronari i truallit ku Robert Bitri ka ndërtuar pallatin 7 katësh tha se i është komunikuar nga vetë bashkia e Tiranës se është pa leje, por që punimet në ndërtesë vijojnë.
“Unë jam pronar i truallit dhe gjithashtu banor këtu. Kam bërë një kërkesë tek IKMT e bashkisë qëndrore, dhe më thanë se pas një muaj vjen përgjigja. Në të njëjtën kohë marr edhe policinë bashkiake, përkohësisht i ndalojnë punimet dhe sapo largohen policët, rifillojnë sërish. Këtë e kam bërë për tre herë me radhë,” tha pronari i truallit duke saktësuar se ndërtesën po e bën Robert Bitri, i cili është pronari. Duke e pranuar se kishte një javë ndërprerje të punimeve, ato kanë nisur sërish:
“Po bëhet një shtesë në një pallat që është po i deputetit Robert Bitri. Ai po punon në fshehtësi. Ne do ta ndjekim këtë në rrugë gjyqësore duke e denoncuar së pari në Polici dhe në Prokurori gjithashtu. Punimet në ndërtesë kanë filluar prej rreth një muaji. Po ndërohet një kat shtesë në një pallat 7 katësh që është në pronësi të deputetit. Nuk kemi pasur asnjë përgjigje të formës së prerë zyrtare për denoncimet që kemi bërë,” tha pronari i truallit ku deputeti Robert Bitri po vazhdon ndërtimin pa leje.
Ndryshe, për ata që nuk keqtrajtojnë turistë spanjoll dhe informohen nga mediat se Rober Bitrit po i lejohet të ndërtoj pa leje, nuk duhet të nxitojnë sepse kjo “mbyllje e syve” nga IKMT nuk është asgjë tjetër vetëm se kthim i borxhit që PS dhe Edi Rama kanë ndaj deputetit i cili me votat e LSI-së u fut në Parlament por jo se përfaqësoj interesat e saj.
