Në relacionet Kosovë-Serbi, Konjufca: Bashkësia ndërkombëtare është e njëanshme!

Kryetari i Parlamentit të Kosovës, Glauk Konjufca, tha sot se bashkësia ndërkombëtare është e njëanshme në relacionet mes Kosovës dhe Serbisë, dhe duhet të jetë më e përcaktuar se çfarë dëshiron prej dy vendeve.

Ai tha se nuk pret diçka as nga raundi i ardhshëm i dialogut mes Kosovës dhe Serbisë, në nivel kryenegociatorësh, që është paralajmëruar të mbahet, edhe as në drejtim të kërkesave që i janë bërë Kosovës për heqje të masave ndaj qarkullimit të mallrave serbe.

“Dialogu, në formatin qysh ka qenë prej vitit 2011, e ka pasur arkivolin më 24 shtator të vitit të kaluar, me sulmin terrorist në Banjskë, sepse informatat të cilat i posedon edhe bashkësia ndërkombëtare edhe institucionet tona të sigurisë, tregojnë qartë se ky grup i madh kriminal e ka pasur mbështetjen e drejtpërdrejtë prej shtetit serb,” tha Glauk Konjufca duke shtuar se bashkësia ndërkombëtare po tregohet e rezervuar në ndëshkim të Serbisë, ndonëse ka informacione se shteti serb qëndron pas sulmit të Banjskës.

“Ne jemi të vetëdijshëm dhe kjo është e qartë që bashkësia ndërkombëtare është e njëanshme në relacionet mes Kosovës dhe Serbisë, për këtë arsye besoj që duhet një drejtm krejt i ri,” tha Kryeparlamentari Konjufca, duke iu referuar dialogut në Bruksel, që ndërmjetësohet nga blloku evropian.

Më 24 shkurt të vitit të kaluar, një grup i armatosur serb e ka sulmuar Policinë e Kosovës në Banjskë të Zveçanit, duke lënë të vrarë rreshterin serb, Afrim Bunjaku. Në këmbim e sipër të zjarrit janë vrarë tre sulmues serbë. Përgjegjësinë për sulmin e ka marrë ish-nënkryetari i Listës Srpska, partisë më të madhe të serbëve në Kosovë, Milan Radoiçiç, i cili besohet se është i lirë në Serbi.

Kosova fajëson direkt shtetin serb për organizim dhe kryerje të sulmit.

Hetime për sulmin janë duke kryer edhe Kosova edhe Serbia, por ende nuk kanë prezantuar ndonjë aktakuzë.

Konjufca tha se as Kosova, dhe as faktori ndërkombëtar nuk mund të publikojnë të dhëna të detajuara nga hetimet për sulmin, për shkak të ndjeshmërisë së rastit.

Kryetari i Parlamentit të Kosovës i ka komentuar edhe raportimet se i dërguari i Gjermanisë për Ballkanin, Manuel Sarrazin, ka kërkuar që të hiqen masat e sigurisë së Kosovës ndaj mallrave serbe.

Qeveria e Kosovës e ka ndaluar importin e mallrave nga Serbia më 15 qershor të vitit të kaluar, një ditë pasi forcat serbe patën arrestuar tre policë të Kosovës. Mediat lokale në Kosovë kanë raportuar që Kosovës mund t’i rrezikohet anëtarësimi në Procesin e Berlinit, nëse nuk merr hapa në këtë drejtim.

“Nuk më duket që Procesi i Berlinit mund të reduktohet në CEFTA,” tha Glauk Konjuca, duke bërë thirrje që të bëhen dallime mes çështjeve ekonomike dhe çështjeve të sigurisë.

“Ato që tha Sarrazin në vizitën e tij në Kosovë është faktikisht një lloj modusi i ledhatimit të Serbisë. Nëse do të keni rajon funksional, ne e dimë cila është rruga. Rruga është barazia e Kosovës me Serbinë, si shtete të pavarura, që marrin pjesë në këto marrëveshje rajonale”.

Në fund, Kryetari i Parlamentit të Kosovës, Glauk Konjufca, tha se nuk pret heqje të masave të Kosovës në mallrat serbe, sidomos jo deri pas mbajtjes së zgjedhjeve të përgjithshme në Kosovë, të caktuara për shkurt të vitit të ardhshëm.

Ndryshe, Kosova është anëtare e CEFTA-s prej vitin 2007 dhe përfaqësohet përmes Misionit të Kombeve të Bashkuara në Kosovë, UNMIK.

Autoritetet kosovare tani kërkojnë që të përfaqësohen si shtet dhe jo përmes misionit të OKB-së.

Shtetet tjera anëtare të CEFTA-s janë Shqipëria, Maqedonia e Veriut, Serbia, Bosnja dhe Hercegovina, Mali i Zi dhe Moldavia.

Në vitin 2006, këto gjashtë shtete të Ballkanit Perëndimor kanë nënshkruar marrëveshje me qëllim të eliminimit të detyrimeve doganore dhe pengesave të tjera për tregtinë e ndërsjellë./RFE/