Në restorantin e Kryeministrisë, Basha: Një herë në 2-3 ditë darkojnë krerët e bandave!

Një herë në 2 apo 3 ditë krerët e bandave të Shqipërisë darkojnë me paratë tuaja në restorantin privat të Kryeministrisë, tha Kryetari i Partisë Demokratike, Lulzim Basha, duke sjellë shembuj se si Edi Rama promovon kriminel ndërsa foli për nevojën e vendit për një Kryeministër që prioritet ka ndarjen e politikës nga krimi.

“Po promovove kriminelët, trafikantët, po drekove e darkove me ta në Kryeministri, nëse kryeministri jep këtë model, çfarë pret nga specialistët? E di unë, e dini ju, e dinë mediat, restoranti privat në Kryeministri, një herë në 2 apo 3 ditë ka krerët e bandave të Shqipërisë, darkojnë me paratë tuaja në restorantin privat të Kryeministrisë. Shqipëria ka nevojë për një kryeministër në lartësinë e pritshmërive tuaja. Një kryeministër që prioritet ka ndarjen e politikës nga krimi. Me mua Kryeministër garantoj se modeli do jetë ai i promovimit të specialistëve, sipas meritës. Për këtë do kemi ndihmën partnerëve tanë,” tha Lulzim Basha gjatë rrugës së tij për në Durrës në një takim me kandidatet e PD për deputete ndërsa iu përgjigj pyetjeve dhe shqetësimeve të qytetarëve se si do ta ndalë ikjen e specialistëve.

Ndërsa i ishte drejtuar Durrësit, Kryetariu i PD tha se ky qytet nuk meriton të përfaqësohet nga emra si Jurgis Çyrbja, Lefter Koka dhe Rrahman Rraja, të cilët sipas Lulzim Bashës janë të lidhur me afera korruptive.

“Ndryshimi që sjell Edi Rama është Çyrbja, Koka, Rraja, ky është ndryshimin që i premton Durrësit. Ndërkohë që pronat e durrsakëve tjetërsohen. Shikoni hotel Vollgën është simboli që ka ndodhur në Shqipëri në këto vite, e kanë kthyer në një luftë bandash, ku të gjithë duan të marrin ndonjë copë. Tetë viteve të vështira po i afrohet fundi,” tha Basha duke siguruar shqiptarët se 25 Prilli është ditë ndryshimi.

Duke bërë të ditur se qëllimi i vizitës së tij në Durrës është prezantimi i kandidateteve të Partisë Demokratike për këtë qark, tha se gratë zënë një vend të rëndësishëm në ideologjinë e Partisë Demokratike, dhe se nënat, motrat, e bashkëshortet tona do të nderohen si të pazëvendësueshme në çdo fushë, dhe të jenë të mbrojtura nga çdo dhunë.

“Në Durrës në takim me kandidatet gra të PD, që do të përfaqësojnë jo vetëm logon tonë, por optimizmin, ndryshimin që gratë shqiptare do të sjellin. Ajo që është e rëndësishme është se do të jemi bashkë në një bashkim forcash dhe energjish, të grave që vijnë nga vende të ndryshme të vendit, port ë bashkuara në një objektiv madhor që është ndryshimi, si domosdoshmëri. Kemi vullnetin për të ecur përpara. Do të shikoni shumë shpejt, se nuk bëhet fjalë për makijazh, por për fat të keq, duket qartë tentative e dështuar e atij që për tetë vite me radhë i ka shkelur me këmbë gratë shqiptare, duke detyruar fëmijët e tyre të ikin në emigracion. Bëhet fjalë për një bashkim të sinqertë ku të gjitha gratë e gjejnë veten. Ka intelektuale, shkrimtare, profesioniste të zonja, kryefamiljare që kanë humbur bashkëshortin dhe kanë luftuar ditë për ditë me sakrificat për të rritur fëmijët e tyre. Ka arsimtare të nderuara që i shërbejnë qytetit, ka artiste, ekonomistë të zonja që e kanë parë shumë mirë këto 8 vite që politikat e dështuara të Ramës kanë sjellë përkeqësim. Ka përfaqësuese si mjeke, inxhiniere, arkitekte, student, pra një bashkim i vërtetë përfaqësues i gruas shqiptare, për t’i prirë ndryshimit.”

Shoqëritë ndahen në dy pjesë, ato ku gratë marrin rolin e tyre janë shoqëri të zhvilluara, por në fakt është barazia mes burrit dhe gruas që sjell përparimin e shoqërisë, ky është vizioni ynë, tha Kryetari i PD, Lulzim Basha, duke përfunduar:

“Do të risim shanset për punësim, do të rrisim pagat, do të minimizojmë dhunën në familje që këtu ndikon ekonomia. Nënat tona, motrat tona, bashkëshortet tona, të nderohen sit ë pazëvendësueshme në çdo fushë, dhe të jetë e mbrojtur nga çdo dhunë, sidomos ajo verbale që frymëzohet nga kryeqeveritari në ikje, me listën e tij të dështuar, që do e largojë më 25 Prill.”