Në rrugë qarkullojnë 868 mijë mjete, 38% më të vjetra se 20 vite, dominojnë “Volkswagen” e “Mercedez Benz”

Në rrugët e vendit qarkullojnë çdo vit gjithnjë e më shumë automjete. Pjesa më e madhe e tyre janë me kambio manuale.

Ndonëse në 2023 ka një rënie të lehtë të mjeteve mbi 20 vjeçare me 1.4 për qind, ato vijojnë të dominojnë flotën e automjeteve në vend, duke zënë 38.6 për qind të totalit, nga 40 për qind një vit më parë.

“Volkswagen” 18,6 për qind dhe “Mercedez Benz” janë markat më të preferuara, me këtë të fundit që po bie nga froni pasi nuk ppo blihen më aq shumë sa dikur. Automjetet janë në pjesën më të madhe me naftë gati 74 për qind. Për nga fuqia, autoveturat sipas vëllimit motorik >3000 cc po shënojnë rritjen më të madhe.

Sipas të dhënave të INSTAT, Në vitin 2023, numri gjithsej i mjeteve rrugore me status “aktiv” dhe “të çregjistruar përkohësisht” rezulton 867.765 mjete, nga 796.438 mjete të regjistruara deri në vitin 2022, duke u rritur me 9.0 për qind. Mjete rrugore sipas llojit

Nga mjetet rrugore sipas llojit, përqindjen më të madhe ndaj numrit gjithsej të mjeteve rrugore e zënë “Autoveturat” 80.6 për qind, “Automjetet për transport të përzier ” 6.2 për qind dhe “Motor” 5.5 për qind.

Kryesojnë Tirana e Durrësi

Në vitin 2023, qarku me numrin më të lartë të mjeteve rrugore është qarku Tiranës me 34.7 për qind, ndjekur nga qarku Durrësit me 13.4 për qind dhe qarku Fierit me 9.3 për qind. E njëjta ecuri sipas qarqeve, vihet re edhe për mjetet rrugore autovetura.

62% e makinave janë me kambio manuale

Referuar të dhënave sipas llojit të kambios, vihet re se peshën më të madhe e zënë mjetet rrugore me kambio manuale me 61.9 për qind të mjeteve rrugore gjithsej.

Autoveturat me kambio “Manuale” zënë 57.9 për qind të autoveturave gjithsej që rezultojnë me status “aktiv” ose “të çrregjistruara përkohësisht” në vitin 2023 ndërkohë Autobuzat me kambio “Manuale” zënë 80.7 për qind të autobuzave gjithsej që rezultojnë me status “aktiv” ose “të çrregjistruara përkohësisht” në vitin 2023.

77% e makinave janë më të vjetra se 10 vjet

Numri i autoveturave të regjistruara në vitin 2023, me vit prodhimi 2011-2023 është rritur me 40.0 për qind, grupi 2000-2010 është rritur me 7.1 për qind ndërsa grupi i autoveturave me vit prodhim para vitit 2000 ka pësuar rënie me 1.4 për qind.

Në total, sipas të dhënave të përpunuara nga Monitor, janë rreth 311 mijë automjete më të vjetra sesa 20 vjet, që përbëjnë 36 për qind të totalit.

353 mijë automjete të tjera, ose gati 41 për qind e totalit kanë një moshë midis 11 dhe 20 vjet.

Në total, gati 77 për qind e automjeteve në vend janë mbi 10 vjeçare duke përbërë një nga flotat më të vjetra në Europë.

Mjete rrugore sipas markës

Ndër markat kryesore të autoveturave që qarkullojnë në vend, dominojnë marka “Volkswagen” 18.6 për qind e ndjekur nga “Mercedez Benz” 18.1 për qind, dhe “Daimler Chrysler” 9.8 për qind.

Në vitin 2023, marka “Mercedez Benz” regjistrohet si marka më e përdorur e autoveturave të regjistruara me vit prodhimi para 2000 dhe viteve 2011-2023. Marka “Volkswagen” regjistrohet si marka më e përhapur e autoveturave me vit prodhimi 2000-2010.

Mjete rrugore sipas lëndës djegëse, dominon nafta

Numri më i madh i autoveturave që qarkulluan në vendin tonë në vitin 2023 kanë përdorur lëndë djegëse “Naftë” duke zënë 73.5 për qind nga 73.7 për qind në vitin 2022, ndjekur nga autoveturat që përdorin lëndë djegëse “Benzinë” me 16.3 për qind ndaj numrit gjithsej të autoveturave nga 16.7 për qind që ky grup zinte deri në vitin 2022.

Vihet re një rritje në numrin e autoveturave elektrike me 2.3 herë më shumë dhe makinave hybride me 2.2 herë më shumë, krahasuar me vitin 2022.

Numri i autobusëve të regjistruar në vitin 2023, që kanë përdorur lëndë djegëse “Naftë” është rritur me 4.1 për qind, ndërsa numri i autobusëve që kanë përdorur lëndë djegëse “Naftë+Elektrik” është rritur me 41.9 për qind krahasuar me vitin 2022.

Rriten autoveturat me fuqi të lartë motorike

Numri i autoveturave të regjistruara në vitin 2023 sipas vëllimit motorik >3000 cc është rritur me 16.2 për qind, numri i autoveturave me vëllim motorik <=2000 cc është rritur me 9.3 për qind dhe me vëllim motorrik 2001-3000 cc është rritur me 8.9 për qind krahasuar me të njëtën periudhë të një viti më parë.

Vëllimi më i përhapur te autoveturat me lëndë djegëse “Naftë” është 1400 cc-1999 cc duke zënë 54.0 për qind gjithsej me lëndë djegëse naftë.

Vëllimi më i përhapur te autoveturat me lëndë djegëse “Benzinë”, është nën 1399 cc duke zënë 59.2 për qind të autoveturave gjithsej me lëndë djegëse benzinë./Monitor/