Në Shkodrën e përmbytur, Berisha: KESH kreu krim!
Gjatë vizitës së zonave të përmbytura në Qarkun Shkodër, Kryetari i Partisë Demokratike, Sali Berisha, akuzoi KESH-in se kreu krim sepse nuk njoftoi që po hapte turbinat, gjë që shkaktoi një katastrofë të vërtetë.
“Nga mbrëmë deri para pak, kanë derdhur 2 mijë metra kub. 1400 a më shumë me turbina. Prandaj kanë bërë këtë përmbytje ata me këto shkarkime kriminale. Kriminale se ishte e parandaluar. Kur kanë kryer krimin, nuk kanë njoftuar kryetarin e Bashkisë, nuk ju kanë njoftuar juve. Ata duhej të njoftonin disa orë përpara,” tha Sali Berisha duke akuzuar Qeverinë e Edi Ramës pas vizitës që i bëri Kuçit ku banorët u shprehën se nuk kishin të shpëtonin asgjë pasi ishte hap kaskada.
“Ata kanë hapur portat dhe turbinat dhe kanë përmbytur brenda gjysmë ore në mënyrë të rrufeshme zonën. Në një kohë kur kryetari i Bashkisë që dje kërkoi që KESH të njoftonte për çdo lëvizje. KESH duhej të njoftonte, ata e kanë detyrim që të njoftonin. E kanë detyrim ligjor,” tha Kryetari i Partisë Demokratike pas vizitës së zonave të përmbytura në Qarkun Shkodër duke përfunduar:
“Por ata donin të vidhnin me importin e energjinë. Donin të vidhnin 10 milionë euro në katër ditë.”
Ndryshe, pas reshjeve të shiut për dy ditë në Qarkun e Shkodrës ku ditë më parë kryeministri Edi Rama shprehej se e kapluar thatësira, u shënuan dy viktima ndërsa me hapjen e kaskakadave përfunduan nën ujë 2.405 hektarë.
