Në Shqipëri Komisione Hetimore, në Kroaci USKOK arreston ministrin
Deri sa në Shqipëri vazhdojnë me show mediatike përmes Komisioneve Hetimore, sot në Kroaci, USKOK, homologe e SPAK-ut shqiptar, arrestoi ministrin e Ndërtimit, Darko Horvat, për keqpërdorim të postit zyrtar.
Pas kontrollit të shtëpisë dhe arrestimit të ministrit Darko Horvat, USKOK ka sqaruar hetimet që janë zhvilluar, ku janë përfshirë dhe disa anëtarë të qeverisë.
“Në këto hetime janë përfshirë disa persona. Një prej tyre është zyrtar shtetëror. Dyshohen se kanë kryer vepra penale në kundërshtim me detyrën zyrtare,” ka sqaruar USKOK përmes një zyrtari për televizionin N1 ndërsa avokati i ministrit të Ndërtimit, Darko Horvat, është shprehur:
“Horvat nuk është shoqëruar për tu marrë në pyetje. Atij i është kontrolluar shtëpia, dhe më pas është arrestuar, dhe në orët e pasdites do të merret në pyetje në zyrat e USKOK në Zagreb.”
Ndryshe, arrestimi i ministrit të Ndërtimit të Kroacisë, Darko Horvat, vjen pas arrestimit të asistentes së tij në kohën kur ishte ministër i Ekonomisë, Ana Mandac, nga ana e USKOK, për shkak të keqpërdorimeve disa milionëshe.
Jozyrtarisht është raportuar nga mediat kroate se USKOK si të dyshuar përveç ministrit të Planifikimit hapsinor, Ndërtimit dhe Pasurisë shtetërore, Darko Horvat, ka dhe ministrin e Sistemit Pensional, Familjes dhe Politikës sociale, Josip Aladroviç dhe Zv/Kryeministrin dhe ministrin e Shtetit, Boris Millosheviç.
Ndërkohë në listën e të dyshuarëve janë dhe ish-ministri i Bujqësisë, Tomislav Tollushiç dhe një Sekretar Shteti në ministrinë e Zhvillimit rajonal dhe Fondeve të BE, si dhe një Drejtore e një ministrie.
