Në Shqipëri nuk deklarohen por në Kroaci specat vijnë nga Maroku, fasulja nga Kanadaja, e shalqiri pa shije vjen nga…
Shpesh ju ka ndodhur të konsumoni fruta ose perime për të cilën jeni shprehur se është pa shije, por kurrë nuk e keni menduar se në një vend me kaq tokë pjellore mund të vijnë fruta-perime nga Irani, Kostarika, Kili ose Peruja! Para se ta mohoni dhe nuk keni se ku ta verifikoni meqë kur ato shiten te shumica nuk deklarohet prejardhja, po ju sjellim një realitet nga Kroacia ku ka pika si Kashari, Lushnja, Divjaka, Rrogozhina etj. ku shiten fruta dhe perime por për dallim nga ne, atje ka shtet dhe aty deklarohet prejardhja e mallit.
E meqë deklarohen prodhimet, jo e gjithë Kroacia konsumon “fasule Korçe” sepse atje vjen edhe nga Kanadaja! Me karrotat dhe kastravecat mund të vazhdoj të mburret Rrogozhina deri në Berat, madje që eksporton në Serbi, por në Kroaci konsumohet karrota dhe kastraveci i Serbisë! Kur me mburrje ju shesin domate vendi dhe shkoni në shtëpi e llahtariseni, mos u çuditni nëse në tryezën tuaj keni domate nga Spanja ose Belgjika sepse ato tregtohen në çdo pikë të shtetit kroat. Nëse lulelakra ose brokoli me raste nuk ka shije, nuk është dhe çudi sepse vjen nga Spanja e mos u ankoni as për bizele meqë mund të jenë nga Kanadaja! Specat kanë filluar me shumicë të mos mburren nga tregtarët se janë nga Kosova, por meqë shkojnë deri në Kroaci nuk kanë arsye të mos vijnë tek ne edhe pse janë nga Maroku, Spanja e Turqia. Mos u mërzitni kur bureku me spinaq nuk ju del si ai i nënës sepse spinaqi mund të ketë bërë rrugëtim të gjatë nga Belgjika deri në tregun tuaj, ashtu si dhe bamjet nga Amerika ndërsa në Kroaci nuk mund të gjesh se s’bënë vetëm “arra Dibre ose Tropoje”! Jo, vijnë nga Kina ashtu si dhe hudhrat, dhe nuk keni arsye të çuditeni sepse edhe qiqrat nuk janë vendi, vijnë nga Bullgaria.
Në një shkrim të gjatë e përditshmja kroate Sllobodna Dalmacija përveç frutave dhe perimeve flet dhe për mishin e freskët vendi i cili nëse është i viçit vjen edhe nga Italia e Rumania ndërsa mishi i peshkut është me prejardhje edhe nga Mbretëria e Bashkuar, Argjentina, India, Kili, Indonezia dhe pse jo edhe Polonia.
Çuditeni për Kroacinë, jo nuk keni arsye mund të jenë ose tashmë dhe janë në frigoriferin tuaj vetëm se nuk jeni informuar kur e keni blerë!
Shqipëria është vend i portokallit dhe limonit por e tillë është dhe Krocia e aty tregtohet ky mall i importuar nga Greqia, ashtu si rrushi i bardhë nga India, rrushi i zi nga Italia e pjeshkët nga Spanja. Rrugës për në Aeroportin e Rinasit mund të ndodhë që përveç se bëheni burim aksidenti të mos jeni i kënaqur me shegën e blerë. Nëse ju themi se mund të vijë nga Peruja habiteni por shumë nga habitë tuaja janë çështje ekonomike, sepse më lirë janë se sa të prodhohen dhe kjo është arsyeja kryesore që importohen. Cila është shija?! Këtë mund ta provoni!
Nga Dhoma kroate e Tregtisë thuhet se më së shumëti importohet mishi, drithërat, niseshtja, qumështi dhe produktet e tij, vezët, mjalta, ushqimi për kafshë dhe pijet.
Në Kroaci ashtu si dhe në Shqipëri aktualisht punët më së miri i kanë ata që dinë të shesin dhe jo ata që dinë të prodhojnë. Kjo është dhe arsyeja pse në tregun e frutave dhe perimeve tregtohet speci i Marokut, fasulja e Kanadasë, arra e Kinës, rrushi i Indisë dhe shalqiri i Kostarikës. Nuk është problemi se ne i kemi këto prodhime, por ato që janë prodhim vendi duhet kërkuar me qiri mu në mes të ditës. ©pafrike.al
